Xəbər saytlarından birində yayılan həmin videoçəkilişin də əlavə olunduğu məlumatlarda bu səhiyyə müəssisəsində xəstələrin “soyulmasından”, müayinə və müalicələrin yazılmamış qiymətlərindən bəhs edilir. Videogörüntüdə Topçubaşov adına Elmi Cərrahiyyə Mərkəzinin əsas binasının birinci mərtəbəsində, 14№-li kabinetdə – kompyuter tomoqrafiyada rüşvətin alınması görüntülənib. Hadisə bu ayın 2-də saat 1200 radələrində baş verib. Gülnaz adlı həkim (Gülya kimi tanınır) xəstələrdən 130, 260 manat “ödənişlər” alır. Ən dəhşətlisi də odur ki, “ödənişdə” güzəşt olunmur, deyilən məbləğ qeyd-şərtsiz verilməlidir. Etiraz edəndə isə bütün dərman və preparatların özləri tərəfindən-şəxsi vəsaitləri ilə alındığını bildirir.
