Bu gün Bakı Ağır Cinayətlər Məhkəməsində ləğv edilmiş KİVDF-nin keçmiş icraçı direktoru Vüqar Səfərlinin cinayət işi üzrə növbəti məhkəmə iclası keçirilib.
Məhkəmə iclasında şahid qismində KİVDF-də aparıcı məsləhətçi vəzifəsində çalışmış Samir Mustafayev dindirilib. O, jurnalistlər üçün tikilmiş binalarla bağlı sualları cavablandırarkən deyib:
“Jurnalistlərə tikilən binalarla bağlı tenderdən kənar şirkətlərlə müqavilələr imzalanıb. Həmin şirkətlər Prezident Aparatının İctimai siyasi şöbənin rəhbərinə yaxın olub. Tender komissiyası yaranana kimi artıq iki binanın təməli qoyulmuşdu. Tenderlərdə hansı şirkətin qalib olmasını Əli Həsənov özü razılaşdırırdı. Mənzillərin kimlərə verilməsinin seçiminə ictimai-siyasi şöbə baxıb, sonra bizə göndərilib. Qəzetlərə maliyyə yardımı normal qaydada həyata keçirilib. Həmin siyahı da Əli Həsənovun şöbəsində razılaşdırılırdı. Maliyyə yardımı ayrılan qəzetlər gündəlik ictimai-siyasi və idman qəzetləri idi. Bəzi qəzetlərin tirajına maliyyə yardımı düşmürdü. Buna görə də onların tiraj sayı saxta arayışlarla çoxaldılırdı”.