Sosial şəbəkədə daha bir vaksin izdihamı barədə görüntü yayılıb.
Bakının Yasamal rayonu, Xiyabani küçəsi, 25 ünvanında yerləşən 39 saylı Şəhər Poliklinikasında vaksinasiya prosesi özbaşınalıqlar və saxtakarlıqla həyata keçirilib.
Bu barədə jurnalist Fimar Hacıyeva özünün facebook səhifəsində məlumat verib:
“TƏBİB, Ramin Bayramlı, İcbari Tibbi Sığorta üzrə Dövlət Agentliyi, Azərbaycan Respublikası Səhiyyə Nazirliyi, Azərbaycan Respublikasının Daxili İşlər Nazirliyi, peyvənd məsələsi alınmadı. 20 gün öncə (19 avqust) onlayn qeydiyyatdan keçib 30 avqust saat 9-a növbə götürmüşdük. Səhər Yeni Yasamaldakı 39 saylı poliklinikaya getdim. Uzun və nizamsız canlı növbə vardı. Bəlli oldu ki, növbə nömrə almaq üçündü. Onlayn növbə nəzərə alınmır. Növbə yazıb hərəyə əzilmiş bir kağız parçası paylayan xanım dedi ki, Təbib onlayn növbəni ləğv edib!!!! (video var).
Bu ara bir oğlan ağız deyəni qulaq eşitməyən qələbəliyə yaxınlaşıb, “mən Covid xəstəsiyəm, test etdirə bilmirəm” – deyib tünlüyə soxuldu. Hərə bir yandan onun üstünə düşüb, qınadı. Mənsə polislə hədələdim. Hamısı boş. Əslində oğlan yalan danışana oxşayırdı. İnsanımız növbəsiz keçmək üçün hər yola əl atır((
Birtəhər yol tapıb peyvənd otağına yaxınlaşdım. 20-ci adamı qəbul edirdilər. Bu ara bir tibb işçisi peyvənd otağının qarşısında dayanan nəzarətçiyə yaxınlaşıb, bu mənim qaynımdı, növbədə 10-cudu, deyib cavan oğlanı növbəsiz içəri ötürdü. Öyrəndim ki, növbədə ilk onluq, arada bəzi yaddaqalan rəqəmlər poliklinika işçiləri üçün saxlanılır. Təbii, saxlama havayı başa gəlmir. İnsanımız hər şeyə əl atır((
Bayırda azı 300 nəfər vardı. Kimlərsə saat 6-dan burda olduqlarını deyirdilər. Narazıların söhbətindən bəlli oldu ki, proses çox ləng gedir və bunun əsas səbəbi peyvənd olunanların adının sistemə salınmasıyla cəmi bir nəfərin məşğul olmasıdır. O da kompyuterdə sürətli işləyə bilmir və sistem də ləng çalışır.
Təbibdən onlayn növbənin ləğvi barədə rəsmi göstəriş gəlib-gəlmədiyini öyrənmək üçün poliklinikanın baş həkiminin yanına qalxdım. Yerində deyildi. Mənim xahişimlə işçilərdən biri harasa zəng edib guya bunu dəqiqləşdirmək istədi. Məni isə sistem yaxşı işləmir, deyib başından elədi (video var). Bir saat bir neçə nəfərlə mübahisə edib, hədsiz əsəbiləşib evə qayıtdım.
Belə yarıtmaz təşkilatçılıqla hansı haqla vətəndaşlardan vaksinasiya tələb edirsiz, Ramin Bayramlı? Dövlət qurumları işdən çıxarmaqla hədələyir, ora getmə, bura gəlmə qadağaları qoyursuz. Hansı haqla?”
Qeyd edək ki, bundan öncə Bakının Sabunçu rayonu, Maştağa qəsəbəsində yerləşən 7 saylı Şəhər Poliklinikasında vaksinasiya zamanı karantin qaydalarının pozulması ilə bağlı görüntülər yayılmışdı. Həmin görüntülərdə çoxlu sayda vətəndaşın vaksin növbəsini gözləyərkən sosial məsafənin qorunmadığı görünürdü.