Avropa Yayım Birliyi (AYB) “Avroviziya 2026” üçün səsvermə qaydalarında dəyişikliklər edib.
Axşam.az-ın məlumatına görə, qurum üzvləri ilə geniş məsləhətləşmələrdən sonra səsvermə sistemində təkmilləşdirmə aparılıb.
Əsas dəyişikliklər bunlardan ibarətdir:
Yarımfinalarda peşəkar münsiflərin qayıdışı: 2022-ci ildən sonra ilk dəfə yarımfinallarda peşəkar münsiflər heyəti iştirak edəcək. Münsiflərin sayı 5-dən 7-yə qaldırılacaq, həmçinin heyətə gənc üzvlər (18–25 yaş) daxil ediləcək. Münsiflərin səsi və tamaşaçı səsi təxminən 50/50 nisbətində olacaq.
Tamaşaçı səsi limitinin azaldılması: Səs verənlərin maksimum səsi 20-dən 10-a endiriləcək. Bu, tamaşaçıları səsini bir neçə iştirakçı arasında bölüşməyə təşviq edəcək.
Qaydaların və davranış kodeksinin gücləndirilməsi: İştirakçı yayımçılar və ifaçılar üçün təqdimat, təşviqat qaydaları yenilənib. Üçüncü tərəflərin, o cümlədən dövlət dəstəyi ilə həyata keçirilən kampaniyaların nəticələrə təsir etməsinə imkan verilməyəcək.
Texniki təhlükəsizlik tədbirlərinin gücləndirilməsi: AYB səsvermədə saxtakarlıq və koordinasiyalı təsirlərin qarşısını almaq üçün “Once” şirkəti ilə əməkdaşlığı davam etdirəcək və şübhəli səsvermə sxemləri diqqətlə izləniləcək.
Peşəkar mütəxəssislərin müxtəlifliyi: Münsif heyətinə musiqi jurnalistləri, müəllimlər, xoreoqraflar, səhnə rejissorları və musiqi sənayesinin digər təcrübəli nümayəndələri daxil ediləcək. Münsiflər yarış başlamazdan əvvəl öz müstəqil və ədalətli səsvermələrinə dair rəsmi bəyanat imzalayacaqlar.
Bütün yeniliklər “Avroviziya” rəhbərlik qrupu tərəfindən təsdiqlənib. Yeniliklərin nəticələri 2026-cı il müsabiqəsindən sonra qiymətləndiriləcək.
Həmçinin, 2026-cı il üçün müsabiqədə iştirak edəcək yayımçıların tam siyahısı isə 25 dekabra qədər açıqlanacaq.
Qeyd edək ki, bu il müsabiqədə 436 balla Avstriya – “JJ” ləqəbi ilə tanınan Yohannes Piç adlı müğənni “Wasted love” mahnısı ilə birinci olub. 70-cisi keçiriləcək “Avroviziya” müsabiqəsi 2026-cı ilin mayına planlaşdırılıb. Musiqili tədbirin ev sahibi Vyana olacaq.