Bizdən nələri aldılar. Niyə qanımıza susayıb içib də doymadılar. Öncə saflığımıza toxundular. Kirlətdilər. İnandırdılar ki, müəllim də yemək yeyir. Müəllimi el doyurmalıdır. Ona toxunmaq olar, şokalad vermək olar yesin, sevinsin. Badalaq gəlmək olar, rüşvət vermək olar yaşasın-maşın, bağ alsın. Qonşunun toyuğuna “kiş” demək nədir, gecəynən kəsib yeməyi öyrənənlər haramı halala qatdılar. Gerçəkçiliyimizi aldılar. Pula satılmağı öyrətdilər, bizi pulla satın aldılar, ölümüzü pulla yudular, dirimizi pulla öldürdülər. Aldılar, aldatdılar, aldıqlarının yeri boş qaldı. Alıb-aldatmaq dünyasına xoş gəldiniz dedilər. Satan aldatdı, alan aldatdı. Satılmağı, satmağı peşəyə çevirdik. Hərə bir cür aldatdı-sözlə aldatdı, əməllə aldatdı, susdu aldatdı, gözünü, qulağını bərk-bərk bağlayıb aldatdı. Başını bağlayıb ətəyini açmaqla aldatdı. Aldanmaq istəyib aldandı, aldatmaq istəyib aldatdı. Aldadıb atdılar. Bizi bizdən qoparıb aldılar. Mənliyimizi aldılar.
Bizi nələrə alışdırdılar. Üzümüzün suyunu tökdülər. Çılpaq əndamlara, şişirdilmiş dodaqlara, köpürdülmüş yanbızlara öyrəşdirdilər. Arvadlı ərlərdən uşaq doğulmasını, hacıların həciliyini, ərli arvadların halal ərlərinin üstundə gedən davalarını adiləşdirdilər. Kişi üstündə savaşlar yaz yağışı olmadı. Babalar, nənələr meymunluq eləməklə “cavanlaşdırmaq” istədi özünü. Yorğan altından “filmlərə” alışdırdılar bizi. Zorla burnumuzu soxdular qaranlıqlara iydən başımız çatladı, gözümüzə işıq saldılar, görməz olaydıq. Sözdəki açar hərfi nöqtəyə döndərib hər şeyi adıyla yazmaqlara, mümkünsüzlərə yoldaş elədilər bizi. Səsimizi oğurladılar, sözümüzü dandılar, adımıza ayama qoşdular, səsimizi səsləndirdilər, “başımızı kəsib” ayrı bədənə calaq elədilər. Buynuzumuz çıxdı. Türmələrin yolu yaxın oldu, qız-gəlinin o yolun yolçusu olması kimsəni diksindirmədi, barı utandıraydı. Hardan hara gəldik, gətirdilər. Elzanı şair elədilər, Xoşqədəmi prokuror, Elgizi “aparıcı”, Mirşahini şərçi. Şairlər susdu, prokurorlar pul saymaqdan baş açmadı, aparıcılar qazanc dalınca qapı-qapı dolaşdılar, çoxüzlü jurnalistlər göbələk kimi artıb çoxaldı. Bu il çoxlu yağış yağdı….
Haqqımızı bizə niyə vermədilər. Oğru aldığını verməz, apardığını qaytarmaz. Oğrular doğruları yedilərmi?
Tik-tok. Tik-tak. Hara gedir bu dünya? Biz sona doğru gedirik, yolun başlanğıcında olanları soruram-haracan gedə biləcəklər bu dünyayla. Bu dünya niyə belə ayağısürüşkən oldu axı, niyə?
Bizi niyə yox saydılar? Saydılarmı? Axı niyə saydılar. Saymanın azalar olduğunu bilmədilərmi. Bildiklərindənmi sayıb azaltdılar. Ölüyə rəhmət, diriyə rəhmət. Dünya bu.
Fimar