Atamız, vətəndaş, şair, pedaqoq, el ağsaqqalı Asim İsa Çələbi oğlu Qazıyevin yeni kitabı çapdan çıxıb. Qardaşımın sayəsində. Ötən ildən bu gün, sabah adıyla yol gələn kitab əlimizdədir. Bu kitab bizim üçün yaddaşdır, atamın xatirəsinə ehtiram, ruhuna sayğı, Asim müəllimin dörd övladı üçün borcdur. Bütün kitabların hər əziyyətini qardaşımız çəkib. Hətta birinci kitabın nəşriyyat xərcini iki dəfə ödəyib. “Qələmin qüdrəti yaz, deyir mənə”, “Xeyli sözüm var”, Ürəkdən soruş”, “Ürək o ürəkdir”. Kitabların adını özümüz seçmişik. Söz, ifadə, fikir, misra atamızındır. “Ürək o ürəkdir”in adında mən bir az qərarsız qaldım. “Ürəkli” kitab vardı deyə. Qardaşımsa bu ürək, o şeirləri yazan, o xeyirxahlıqları edən, həmişə insanlar üçün çırpınan ürəkdir, eyni ürəkdir-dedi. İyirmisində, əllisində, yetmişində eyni həvəslə yazan, eyni şövqlə sevən, sevilən ürək. Beləcə ad seçildi.
Ürək o ürəkdir
əlli yaşın şeiri
Dostum, bu il çatdım əlli yaşa mən,
Cavanlıq dövrünü vurdum başa mən;
Yenə də baxıram gözə, qaşa mən,
Saçım ağarsa da hələ deyil bəs,
Ürək o ürəkdir, həvəs o həvəs!
Aləmdir gözəlin bir xoş duruşu,
Alıb ixtiyarı aparır huşu,
Nəğmələr oxuyur məhəbbət quşu.
Bu quş olsa da qocalıq qəfəs,
Ürək o ürəkdir, həvəs o həvəs!
Vaxt ötür, dizlərdə taqət azalır,
Taleyim həyatdan payı az alır,
İndi bir danışmaq, bir baxmaq qalır,
Hər yerdə, hər zaman ucalır bu səs:
Ürək o ürəkdir, həvəs o həvəs!
Alimlə silinib yamanlıq hisi,
Duyuram, seçirəm yaxşını, pisi,
Tükənməz ürəyin arzusu, hissi,
Bu sözü inanın demirəm əbəs:
Ürək o ürəkdir, həvəs o həvəs!
Saflıq, vəfa, düzlük qalır canımda,
İnsanlıq, kişilik durur qanımda.
İstərəm dəmadəm olsun yanımda
Alovlu bir baxış, isti bir nəfəs,
Urək o ürəkdir, həvəs o həvəs!
Mən elə nə verdim, görənlər bilir,
Meyvənin dadını dərənlər bilir.
Bəxt bir yandan yazır, bir yandan silir;
Asim, aydın oldu, sözü burda kəs;
Ürək o ürəkdir, həvəs o həvəs!
İlk kitabın çap prosesindən xəbərsiz olmuşam, hazırını görmüşəm, qalanlarda az-çox əməyim var. Sevincliyəm, qardaşımsa xoşbəxtdir. Atamın əsərlərini çap etdirmək vədini yerinə yetirib. Özünə söz veribmiş, sözünü tutub. Atasının oğludur!
Hələ bir kompüter səhifəsi belə hazır olmayan gələcək kitabın adı “Mən insanam” olacaq. Bu qədər sadə və atamızın həyat fəlsəfəsini, yaşamını, yaşamdan sonrakı yaşarlılığını tam əhatə edən şeirin adıyla. Kitabın işçilik adı “Ömrün fəsilləri”dir. Dopdolu, işıqlı və işığı çoxlarının yolunu aydınladan bir ömrün yazı, yayı, payızı, qışı. Güllü mayda başlayıb soyuq fevralda bitən ömrün. Bizim üçün davam edən, “Mən insanam” ehkamıyla yaşanan ömrün yüzüncü ilidir bu il. İllər ötdükcə saralıb-solan əlyazmalarda dəyərini itirməyən, müəllifini yaşatdıran nə qədər əsər var hələ.
Bakı.1973-cü il.
Mən insanam; mən günəşəm, mən baharam,
İnsanlara xeyir versəm, demək: varam.
Mən çəmənəm, mən gur çayam, mən torpağam,
Mən yaratsam, mən yaşatsam, demək: sağam.
Mən nəğməyəm, mən ümidəm, mən arzuyam,
Olduğum tək görünürəm, demək: buyam.
Mən çiçəyəm, mən xoş sözəm, mən səhərəm,
Məhəbbətəm, sədaqətəm, demək: zərəm.
Mən hicranam, mən vüsalam, mən atəşəm,
Ürəkləri titrətməkdir, demək peşəm.
Mən küləyəm, mən bir dağam, mən dənizəm,
Ata-baba yadigarı, demək: izəm.
Mən səmayam, mən buludam, mən şimşəyəm,
Eşidənlər ayırd edər, demək nəyəm?
Mən insanam, mən günəşəm, mən baharam,
İnsanlara xeyir versəm, demək, Varam.
“Ürək o ürəkdir” kitabında daha çox çapı ləngiyən şeirlər yer alıb. Şeiri yaradan çox nəsnələr var- həyat, duyğular, sevinclər, sevgilər, arzular, çətinliklər, vurğunluqlar,…. Bir az poetik heyranlıq, bir az fəlsəfə, bir az axınla ayaqlaşmaq, ondan bir az, bundan bir az. Bu kitabda yer alan şeirlərsə bütünlüklə gerçəkliklərdən yoğrulub, gündəlik həyatdan götürülüb. O anda yaranan hislərin sözə, misraya çevrilişidir. Tanıyanlar bilir, tanımayanlar sözümün gerçəkliyinə inansın, Asim Qazıyevin şeirləri onun bitməyən həyat eşqindən süzülən yaradıcılıqdır. Onun özüdür.
Bağçada bülbül, Dildə şirinlik,
Zəmidə sünbül, Sözdə dərinlik
Sinədə könül Yayda sərinlik,
Necə gözəldir! Necə gözəldir!
Qucaqda uşaq, Yarın gül üzü,
Budaqda yarpaq, Dostun xoş sözü,
Dərədə bulaq Bulağın gözü
Necə gözəldir! Necə gözəldir!
Dodaqda gülüş, Zirvədə qartal,
Yar ilə görüş, Könüldə amal,
Zirvəyə yürüş, İnsanda kamal,
Necə gözəldir! Necə gözəldir!
Çəməndə lalə, Canan nəfəsi,
Gül üstə jalə Sevmək həvəsi,
Səmada halə, Körpənin səsi
Necə gözəldir! Necə gözəldir!
Dənizdə ada, Sevib kam almaq,
Kim yetsə dada, Adla ucalmaq
Könüldə sevda , Yadlarda qalmaq
Necə gözəldir! Necə gözəldir!
İnsanın özü, Bilinsə dadım,
Həqiqət sözü, Yetsə muradım,
Ürəyin közü Anılsa adım,
Necə gözəldir! Necə gözəldir!
Fimar Asimqızı