Qarabağdan Ermənistana gedənlərin sayının 100 mini keçdiyi bildirilir

“Qarabağdan gedənlərin üçdə birini uşaqlar təşkil edir”, – Ermənistan mediası UNİCEF-ə istinadən yazıb.

BMT isə Ermənistana gedənlərin sayının 88 mindən çox olduğunu bildirib.

Separatçı “DQR-ın prezidenti” Samvel Şahramanyan sentyabrın 19-20-də baş vermiş hərbi əməliyyatlar nəticəsində “həlak olan və itkin düşənlərin qalıqları üçün axtarış-xilasetmə əməliyyatları həyata keçirilənədək bir qrup rəsmi şəxslə birlikdə Stepanakertdə qalacaq”, – Ermənistanın news.am saytı bazar günü xəbər verib.

Qarabağdakı separatçı qurum ötən cümə axşamı özünü buraxdığını və gələn il yanvarın 1-nə qədər “idarə və təşkilatlar”ın ləğv olunacağını açıqlayıb.

Azərbaycan sentyabrın 19-da Qarabağda “antiterrer tədbirləri” keçirib. Növbəti gün atəşkəs elan olunub və sentyabrın 21-dən başlayaraq indiyədək Qarabağ ermənilərinin reinteqrasiyası üçün Qarabağ ermənilərinin nümayəndələri ilə üç dəfə reiteqrasiya və humanitar məsələləri müzakirə olunub.

Azərbaycan Qarabağ ermənilərinə ilkin qeydiyyatdan keçmək üçün reintegration.gov.az ünvanlı platforma yaradıb.

Platformanın məqsədi “erməni sakinlərin bütün dövlət xidmətlərindən səmərəli şəkildə yararlana bilmələri üçün” imkan yaratmaqdır”, Azərbaycan hökuməti bildirib.

Rəsmi Bakı “Ermənistanın Baş nazirinin Azərbaycanın Qarabağ bölgəsində yaşayan erməni sakinlərin guya “etnik təmizləmə”yə məruz qalması haqda dediklərini qətiyyətlə pisləyir və rədd edir”, – cümə axşamı Azərbaycan Xarici İşlər Nazirliyi Nikol Paşinyanın bugünki hökumət iclasındakı bəyanatını şərh edərkən deyib.

Ermənistanın Baş naziri Nikol Paşinyan Nazirlər Kabinetinin cümə axşamı keçirilən iclasında bildirib ki, “yaxın günlərdə Dağlıq Qarabağda daha erməni qalmayacaq”.

Onun sözlərinə görə, ermənilərin Qarabağdan çıxması Bakının apardığı “etnik təmizləmə siyasəti” nəticəsində davam edir.

Azərbaycan XİN bildirir ki, “bu cür həyəcan təbili çalan rəvayət, Ermənistan Baş nazirinin Azərbaycan tərəfindən erməni sakinlərə qarşı heç bir təhlükənin olmadığını söylədiyi daha əvvəlki bəyanatı ilə ziddiyyət təşkil edir”.

Rəsmi Bakı deyib ki, əgər erməni sakinlərindən kimsə Azərbaycan qanunvericiliyi və hakimiyyəti çərçivəsində yaşamaq və ona tabe olmaq istəmirsə, onları buna məcbur edə bilməz.

Bununla yanaşı, Azərbaycan XİN erməni sakinləri öz yaşayış yerlərini tərk etməməyə və “multietnik Azərbaycan cəmiyyətinin bir hissəsi olmağa” çağırıb.

Ermənistanın cümə axşamı yaydığı rəsmi məlumata görə, Qarabağı artıq 70 minə yaxın erməni sakin tərk edib.

Azərbaycan isə hələlik Qarabağı tərk edən erməni sakinlərin sayını açıqlamayıb.

Ermənistan Qarabağda 120 min, Azərbaycan 50 min etnik erməninin yaşadığını deyir.

Azərbaycan Dövlət Sərhəd Xidməti sentyabrın 27-də separatçı qurumun “dövlət naziri” olmuş, erməni əsilli rusiyalı iş adamı Ruben Vardanyan Qarabağı tərk edərkən saxlayıb.

Ermənistan rəsmiləri çərşənbə günü bildiriblər ki, Qarabağı minərlə erməni sakin tərk edib.

Xankəndi şəhərindən olan və bir neçə saatdır şəhərdən çıxaraq, Ermənistana tərəf yol aldığını X-da yazmış Marut Vanyan da çərşənbə axşamı günü onun kimi şəhərdən Ermənistana istiqamətlənmiş erməniləri daşıyan avtomobilləri “maşın seli” adlandırıb.

“Sadəcə bir maşın seli… Stepanakertdən Həkəriyə… İki metr getdik, iki saat gözlədik… Səbirli olun, hələ yola çıxmayanlar…” – Vanyan yazıb.

Azərbaycanın sentyabrın 19-da başlatdığı və bir gün sonra dayandırdığı “antirerror əməliyyatı”ndan sonra Qarabağda yaşayan ermənilər oranı tərk etməyə başlayıb.

Əməliyyatlar zamanı hər iki tərəf itki verib.

Qarabağdakı yanacaq anbarında partlayışda onlarla adam ölüb

Xankəndi yaxınlığında sentyabrın 25-i axşam saatlarında yanacaqdoldurma məntəqəsində baş vermiş partlayışda onlarla adam ölüb, 105 nəfər ikin düşüb, yaralıların sayı 300-ə yaxınlaşıb, Ermənistan rəsmiləri açıqlayıb.

Azərbaycan Fövqəladə Hallar Nazirliyinin açıqlamasına görə, yanğını söndürmək üçün göndərilən azərbaycanlı yanğınsöndürənlər yanğının genişlənməsinə imkan verməyərək onub söndürüblər.

FHN hadisə yerinə 15 xüsusi təyinatlı yanğınsöndürmə avtomobili heyəti göndırdiyini bildirib.

Videoya Youtube kanalamızda baxın.

Ermənistanın “zərərçəkənlərə kömək etmək üçün həkimlər qrupu bu gün helikopterlə Xankəndiyə uçub.

Rəsmi Bakı bildirib ki, Ermənistandan Xankəndiyə tibbi yardım göstərmək üçün göndərilən helikopterin Qarabağa daxil olması təmin edilib.

Ağdam, Sabirabad, Saatlı xəstəxanaları Xankəndi şəhərindən yaralıları “qəbul etmək üçün boşaldılıb, tibbi heyət isə gücləndirilib”, – Azərbaycan Prezidentinin köməkçisi Hikmət Hacıyev X-da yazıb.

Xankəndidə müstəqil fəaliyyət göstərən jurnalist Siranush Sargsyan X hesabında yazıb ki, yaralıların bəziləri Rusiya sülhməramlılarının hospitalına, bəzilər uşaq xəstəxanasına yerləşdirilib. O, yaralıların sayının yüksək olduğunu bildirir. Siranush Sargsyanın paylaşdığı videoda bir neçə sarıqlı yaralının, bədənində yanıq izləri olan zərərçəkənin uzun xəstəxana dəhlizində tibbi xidmət aldığı görünür.

Partlayışdan sonra Qarabağdakı separatçı qurumun “ombudsman”ı Geğam Stepanyan bildirib ki, Qarabağda yaralıların həyatını xilas etmək üçün yetərli tibbi imkanlar yoxdur, onlar təcili sanitar aviasiya ilə aparılmalıdırlar. .

Sentyabrın 25-də gecə saatlarında Azərbaycan Prezident Adminstrasiyası 200-dən çox yaralı üçün hadisə yerinə tibbi yardım göndərdiyini açıqlayıb, Azərtac yazıb.

Hikmət Hacıyev X hesabında bildirib ki, bölgədə ehtiyacları qarşılamaq üçün Azərbaycan həm Beynəlxalq Qızıl Xaç Komitəsinin, həm də Qarabağ ermənilərinin nümayəndələri ilə davamlı əlaqə saxlayır.

TASS yazıb ki, bu qədər çox adamın xəsarət almasına səbəb yanacaq çatışmazlığı şərtləri altında Ermənistana getmək istəyən şəxslərin yanacaq üçün məntəqəyə toplaşması olub.

Ermənistan Səhiyyə Nazirliyi bazar ertəsi bildirib ki, yaralıların quru və hava vasitələri ilə Ermənistan xəstəxanalarına çatdırılması üçün tədbirlər görülür

Dağlıq Qarabağda baş vermiş partlayışda yaralanan erməniləri daşıyan ilk helikopter Sisyana enib.

Oradan isə paytaxtın tibb mərkəzlərinə köçürüləcəklər.

Rəsmi Bakı Qarabağ ermənilərinə müəyyən sahələr üzrə birgə işçi qrupların yaradılmasını təklif edib

Bazar ertəsi günü Xocalıda rəsmi Bakı ilə Qarabağ ermənilərinin təmsilçiləri arasında keçirilmiş görüşdə müəyyən işlərin həyata keçirilməsi təklif olunub, Azərbaycan Prezident Adminstrasiyası açıqlayıb:

Qarabağdakı separatçı qurumun bu görüşlə bağlı açıqlaması yoxdur, amma Ermənistan hökuməti açıqlayıb ki, minlərlə erməni Qarabağı tərk edib.

Bundan əvvəl tərəflər Yevlaxda görüşüb, daha sonra Azərbaycan Xankəndi şəhərinə humanitar yardım göndərib və Xankəndinin elektrik enerjisini Azərbaycan enerji sisteminə qoşub.

“Politico”nun Rusiya, Türkiyə və Cənubi Qafqaz üzrə yazan jurnalisti Gabriel Gavin X sosial media hesabında “yüzlərlə, bəlkə də minlərlə şəxs Dağlıq Qarabağı tərk etdiyi üçün Kornidzor magistralında maşın seli yaranıb” yazıb.

Xankəndinin enerji sistemi Azərbaycanın enerji sisteminə qoşulub

Rəsmi Bakı şənbə günü axşam saatlarında açıqlayıb ki, Xankəndi şəhərinin enerji sistemi Azərbaycanın enerji sisteminə qoşulub.

Şəhərin elektrik enerjisi indiyə kimi Ermənistandan gəlirdi.

Azərbaycan sentyabrın 19-da 6 vətəndaşının Xocavənd rayonu ərazisində minaya düşərək həlak olmasını “terror aktı” kimi qiymətləndirmişdi və bu hadisənin Qarabağdakı Ermənistan silahlı qüvvələri tərəfindən törədildiyini bildirmişdi. Rəsmi Yerevan isə Bakının bu ittihamlarını rədd edərək, Qarabağda hər hansı qoşunun və ya əsgəri birliyinin olmadığını deyib.

Mina partlayışından sonra Azərbaycanın Müdafiə Nazirliyi beynəlxalq səviyyədə Azərbaycan ərazisi kimi tanınan Qarabağda “konstitusiya quruluşunu bərpa etmək və təhlükəsizliyi təmin etmək” məqsədi ilə “antiterror tədbirləri” keçirib.

Azərbaycan sentyabrın 20-də Qarabağdakı “qanunsuz silahlıların təslim olduğunu” elan etdikdən sonra “antiterror tədbirlərinin” başa çatdığını bildirib.

Daha sonra Yevlaxda Qarabağ ermənilərinin nümayəndələri ilə rəsmi Bakı arasında baş tutan dialoqda tərəflər reinteqrasiya və humanitar məsələlərlə bağlı müəyyən razılığın olduğunu bildiriblər.

“Azərbaycan vətəndaşlığı almaq istəyənlər də var”

Separatçı DQR İnformasiya Mərkəzinin Facebook sosial media hesabında birinci mərhələdə evsiz qalan və öz arzusu ilə Ermənistana getmək istəyənlərin göndəriləcəyini diqqətə çatdırıb.

“Son hərbi tədbirlərdən sonra evsiz qalan ailələr, eləcə də öz arzusu ilə respublikanı (Qarabağı-red) tərk etmək istəyənlər Ermənistana göndəriləcəklər. Hökumət (separatçı DQR hökuməti-red) digər əhali qruplarının da köçürülməsi ilə bağlı tezliklə məlumat verəcək”, – separatçı DQR İnformasiya Mərkəzinin bəyanatında deyilir.

Azərbaycanın Daxili İşlər Nazirliyinin sözçüsü Elşad Hacyev BBC-yə bildirib ki, Qarabağ erməniləri arasında Azərbaycan vətəndaşlığı almaq üçün müraciət edənlər də var.

Onun sözlərinə görə, həmin şəxsləri daha çox təhlükəsizlikləri və sağlamlıqları ilə bağlı məsələlər maraqlandırır.

Qurumun rəsmisi vətəndaşlıqla bağlı müraciət edən erməni əsilli şəxslərin müraciətinə müvafiq qaydada baxılacağını diqqətə çatdırıb.

Prezident İlham Əliyev şənbə günü Bakıda səfərdə olan Avropa İttifaqının Cənubi Qafqaz üzrə xüsusi nümayəndəsi Toivo Klaarla müzakirələr zamanı Qarabağdakı ermənilərin “bütün hüquqlarının – təhsil, mədəniyyət, din, bələdiyyə, seçki və digər hüquqlarının təmin olunacağını” bildirib, president.az saytı yazıb.

Azərbaycan hökuməti Qarabağda sosial, humanitar, iqtisadi və infrastruktur məsələlərin həlli ilə bağlı işçı qrupu yaradıb, Prezident İlham Əliyev deyib.

Paşinyan: “Qarabağ ermənilərini qəbul etməyə hazırıq”

Rəsmi Bakı Qarabağ ermənilərinin nümayəndələri ilə Yevlaxda əldə edilən “antiterror tədbirlərinin” dayandırılması ilə bağlı razılaşmadan sonra Qarabağda mövcud olan Ermənistan Silahlı Qüvvələrinin üzvlərinin də sərbəst şəkildə Ermənistana keçidinin təmin olunacağını elan etmişdi. Azərbaycan tərəfinin bununla bağlı yeganə şərti isə həmin şəxslərin silahı yerə qoymaları idi.

“20 sentyabrda antiterror tədbirlərinin dayandırılması ilə bağlı əldə edilən razılaşma çərçivəsində Azərbaycan açıq şəkildə bildirib ki, İkinci Qarabağ müharibəsində, eləcə də son hərbi əməliyyatlarda iştirak edən şəxslər silahı yerə qoyarlarsa, onlar azad olacaqlar. Bu, Ermənistan Silahlı Qüvvələrinin Qarabağdakı üzvlərinə də aiddir. Əgər onlar silahı yerə qoysalar, onların Ermənistana geri qayıtmaları təmin ediləcək”, – Azərbaycan Prezidentinin köməkçisi Hikmət Hacıyev Al Jazeera-yə müsahibəsində deyib.

Ermənistanın İctimai Radiosu isə bildirmişdi ki, Azərbaycan vətəndaşlığı almaq istəməyən və Qarabağı tərk etməyə qərar verən erməni ailələr Rusiya sülhməramlılarının müşayiəti ilə Ermənistana yola salınır.

Ermənistanın Baş naziri Nikol Paşinyan bazar günü etdiyi müraciətində Qarabağdan olan erməniləri qəbul etməyə hazır olduqlarını diqqətə çatdırıb.

“Əgər Qarabağ ermənilərinin hüquq və təhlükəsizliklərinə təminatın verilməsi ilə bağlı edilən cəhdlər nəticə verməsə, o zaman Ermənistan Respublikası Dağlıq-Qarabağdan olan qardaş və bacılarına qucaq açacaq”, – Paşinyan deyib, Ermənistanın İctimai Radiosu yazıb.(BBC.com)