Bu gün Azərbaycanda “Anım Günü”dür. Ölkədə 2020-ci ildə Azərbaycanın keçmiş Dağlıq Qarabağ muxtar bölgəsi ətrafındakı 7 rayonu, keçmiş Hadrut rayonunu və Şuşa şəhərini azad etməsi ilə nəticələnən 44 günlük müharibənin qəhrəmanları yad olunur.
Hərbi əməliyyatlar zamanı 3 min Azərbaycan hərbiçisi həlak olub.
Azərbaycan prezidenti İlham Əliyevin sərəncamına uyğun olaraq, 27 sentyabr – hərbi əməliyyatların başladığı tarix Azərbaycanda ölkənin ərazi bütövlüyünün bərpa edilməsi uğrunda mübarizədə həlak olan hərbiçilərə hörmət əlaməti olaraq “Anım Günü” elan olunub.
3 il əvvəl sentyabrın 27-də işğal olunmuş ərazilərin azad edilməsi uğrunda hərbi əməliyyatların başlaması, indi isə bu tarixə yaxın bir vaxtda Azərbaycanın bütün ölkə ərazisi üzərində suverenliyini tamamilə bərpa etməsi rəmzi xarakter daşıyır.
Anım Günündə Azərbaycan prezidenti İlham Əliyev Bakıda tikintisi davam edən Zəfər Parkına baş çəkib.