- Tom Bateman və Laura Gozzi
ŞƏKLİN MƏNBƏYİ,EPA
Türkiyədə rəsmilər bazar ertəsi baş verən zəlzələdə uçmuş binaların tikintisi ilə bağlı 113 həbs qərarı verildiyini bildiriblər.
Türkiyə polisi artıq tikinti podratçıları da daxil, azı 12 nəfəri saxlayıb.
Bu arada Türkiyənin cənubundakı iğtişaşlar bəzi yerlərdə xilasetmə işlərini dayandırıb.
Türkiyə və Suriyada öldüyü təsdiqlənən insanların sayı 30 mini keçib.
Daha çox həbslər gözlənilir – lakin bir çoxları tərəfindən bu fəlakətə görə ümumi məsuliyyətdən yayınmaq cəhdi kimi qiymətləndiriləcək.
İllərdir ki, ekspertlər Türkiyədə yeni tikilən bir çox binanın korrupsiya və hökumət siyasəti səbəbindən təhlükəli olduğuna dair xəbərdarlıq edirdilər.
Bu siyasət o cümlədən zəlzələyə meyilli bölgələrdə də tikinti bumunu təşviq etmək üçün tikinti qaydalarını pozan podratçıların amnistiya olunmasına imkan verirdi.
Zəlzələ zamanı minlərlə binanın dağılması bunun səbəbinin yalnız təbii fəlakətlə bağlı olması və ya insan faktorunun da burada rol oynaması barədə suallar doğurur.
Seçkilərin yaxınlaşması ilə 20 il hakimiyyətdə olan prezidentin gələcəyi təhlükə altındadır.
Cənab Erdoğan çatışmazlıqların olduğunu etiraf edib, lakin fəlakət zonasına bir səfəri zamanı o, baş verənlərə görə təbii fəlakəti və taleyi günahlandıraraq deyib: “Belə şeylər həmişə olub”.
Zəlzələdən sonrakı altıncı gündə vəziyyət daha da çətinləşib.
Şənbə günü Almaniya xilasediciləri və Avstriya ordusu Hatay vilayətində adı açıqlanmayan qruplar arasında iğtişaşlar səbəbiylə axtarış əməliyyatlarını dayandırıb. Xilasedicilərdən birinin dediyinə görə, ərzaq ehtiyatları azaldıqca təhlükəsizliyin daha da pisləşəcəyi gözlənilir.
“Türkiyədə qruplaşmalar arasında aqressiya getdikcə artır”, avstriyalı polkovnik-leytenant Pierre Kugelweis deyib.
Türkiyə ordusunun himayəsi altında axtarış-xilasetmə işləri bərpa olunub.
Türkiyənin cənubunda və Suriyanın şimalında milyonlarla insan evsiz qalıb və gecələr burada havalar şaxtalı olur.
BMT-nin yardım agentliyi 800 mindən çox insanın normal yeməkdən məhrum olduğu və zəlzələ nəticəsində ölənlərin son sayının iki qat arta biləcəyi barədə xəbərdarlıq edib.
Suriyada ölənlərin sayı indi 3500-dən çoxdur – lakin cümə günündən bəri bu rəqəm yenilənməyib.
Şənbə günü dağıntılar altından xilas edilənlər arasında Türkiyənin Qaziantep vilayətində 5 nəfərlik ailə və Hatayda 132 saat dağıntılar altında qalan 7 yaşlı qız uşağı da var.
Şənbə günü Türkiyənin Kahramanmaraş vilayətində olan BMT-nin yardım agentliyinin rəhbəri zəlzələni “bu bölgədə son 100 ilin ən ağır hadisəsi” kimi qiymətləndirib.
“Düşünürəm ki, bu, indiyə qədər gördüyüm ən dəhşətli təbii fəlakət və eyni zamanda ən qeyri-adi beynəlxalq reaksiyadır”, – Martin Griffiths BBC-nin Türkiyədəki müxbiri Lyse Doucet-ə deyib.
Cənab Griffiths fəlakət qarşısında regional siyasəti bir kənara qoymağa çağırıb və bunun baş verdiyini göstərən bəzi əlamətlər var.
Şənbə günü humanitar yardımın buraxılması üçün Türkiyə ilə Ermənistan arasındakı sərhəd keçidi 35 ildə ilk dəfə olaraq açılıb. (BBC.com)