Məhkəmə proseslərinin tənzimlənməsi ilə bağlı qanunvericiliyə ediləcək dəyişiklik müstəqil vəkillər və hüquqşünaslar tərəfindən narazılıqla qarşılanıb.
Mülki Prosessual Məcəlləyə yeni əlavə edilməsi təklif edilən 174.5-ci maddəyə əsasən məhkəmə açıq-aşkar əsassız vəsatət və şikayətlər verən, yaxud işə düzgün və tezliklə baxılmasına və onun həll edilməsinə aşkar surətdə maneçilik törədən tərəfi, onun nümayəndəsini və ya vəkilini 500 manatadək cərimə edə bilər.
Təklif müstəqil vəkillər və hüquqşünasların etirazına səbəb olub.
Vəkil Fariz Namazlı facebook səhifəsində bildirib: “Məhkəmə vəsatəti rədd edəndə hakim əsassız olduğundan təmin edilmədiyini deyir. İndi cərimə olunmaq qorxusu ilə vəsatət də verə bilməyəcəyik”.
Vkil Aqil Layıc isə vəkilin prosesdə tərəf olmadığını bildirərək, vəkilin prosessual məsələyə görə cərimələnməsini hüquqi nihilizm adlandırıb: “Guya vəkillərin vəsatətləri prosesdə təmin edilirdi ki, cərimə də edilsin?! Ədalət mühakiməsinə nüfuz vəkilin qanunsuz cərimələnməsi ilə ölçülə bilməz. Cərimə və intizama cəlb ediləcək yeganə şəxslər varsa, Avropa Məhkəməsində dövlət əleyhinə qərarın çıxmasına rəvac verən hakimlərdir”.
Vəkil Elçin Sadıqov isə bildirib: “Bundan sonra hakim vəkilə deyəcək ki, filan vəsatəti qaldırsan, səni cərimələyəcəm. “Ağıllı ol”, qoy, işi tez yekunlaşdırım, yoxsa qarşı tərəf verdiyi pulu alacaq. Bu dəyişiklik ölkədə kölə, qorxaq vəkillik formalaşdırmaq üçündür. Bəs vəkillik inkişaf etmişdi?”
Hüquqşünas Ələsgər Məmmədli isə qeyd edib ki, təklifin heç bir legitim əsası yoxdur. O, təklifi vəkili aşağılayan təklif adlandırıb: “Bir digər yanlış təklif, bu dövlət rüsumlarının 50 faizi (ödənilən hər bir dövlət rüsumu üzrə 5000 manatdan çox olmamaq şərtilə) müvafiq məhkəmələrin aparatlarının işçilərinin sosial müdafiəsini gücləndirmək və maddi təminatını yaxşılaşdırmaq üçün müvafiq olaraq Ali Məhkəmənin, apelyasiya instansiyası məhkəmələrinin və müvafiq icra hakimiyyəti orqanının xəzinə hesablarına köçürülməsinin nəzərdə tutulmasıdır. Dövlət rüsumu tam büdcəyə ödənilməli, məhkəmə çalışanlarının sosial müdafiəsi isə heç bir şərtə-yığıma tabe olmadan birbaşa dövlət büdcəsindən ödənməlidir”.