Sentyabrın 27-də İkinci Qarabağ müharibəsinin başlamasından 5 il ötür.
44 gün çəkən müharibədən sonra Azərbaycan 30 ilə yaxın işğal altında olan ərazilərini, o cümlədən Dağlıq Qarabağın bir hissəsini azad edib, Şuşaya bayrağını sancıb, ərazi bütövlüyünü və suverenliyini təmin edib.
İkinci Qarabağ Müharibəsinin başlaması günü Anım Günü və Şuşanın işğaldan azad edildiyi gün Zəfər günü kimi təsis edilib.
2020-ci ilin noyabrın 9-da Azərbaycan, Rusiya və Ermənistan arasında imzalanmış bəyanat nəticəsində müharibə dayandı və Qarabağa rus sülhməramlıları girdi.
İkinci Qarabağ Müharibəsində Azərbaycan 3 minə yaxın, Ermənistan 3 mindən çox hərbçisini itirib, hər iki tərəfdən minlərlə hərbçi müxtəlif yaralar alıb. Hər iki tərəfdən dinc insanlar da həlak olub və yaralanıb.
Azərbaycanın iki il əvvəl , sentyabrın 20-də Qarabağda apardığı birgünlük hərbi əməliyyatından sonra separatçı Dağlıq Qarabağ Respublikası təslim olduğunu və özünü buraxdığını bəyan edib, Qarabağda yaşayan ermənilər kütləvi şəkildə oranı tərk edib.
Bundan bir müddət sonra Rusiya sülhməramlıları da Qarabağı tərk edib.
Azərbaycan sentyabrın 20-də ərazi bütövlüyünün bərpa olunduğunu əsas gətirərək həmin günü Dövlət Suverenliyi Günü elan edib.
Amma İkinci Qarabağ müharibəsinin başa çatmasından 5 il keçməsinə baxmayaraq, Azərbaycan və Ermənistan arasında hələ də sülh sazişi imzalanmayıb, yalnız sazişin mətni artıq razılaşdırılıb və qəbul edilib.
Sülh sazişinin nə zaman imzalanacağı isə hələ bəlli deyil. Çünki Azərbaycan sazişin imzalanması üçün Ermənistan Konstitusiyasından Azərbaycan ərazisinə iddia əks etdirən müddəanın çıxarılmasını tələb edir.
Ermənistan hazırkı Konstitusiyasının sülh sazişi bağlanması üçün əngəl olmadığını hesab edir və Azərbaycana qarşı hər hansı ərazi iddiası olmadığını bəyan edir.
Bununla belə, Ermənistan Konstitusiyaya dəyişikliklər oluna biləcəyini istisna etmir.
Bundan başqa, tərəflər Naxçıvanı Azərbaycanın qalan hissəsinə Ermənistan üzərindən birləşdirən yolun- Azərbaycan bunu “Zəngəzur dəhlizi” adlandırırdı, – ABŞ şirkətinə 99 illik icarəyə verilməsini dəstəkləyib və onu Trump Marşrutu adlandırıb.
Bakı və Yerevanın müraciəti əsasında 1992-ci ildə Qarabağ münaqişəsinin həlli üçün yaradılmış ATƏT-in Mİnsk qrupu ləğv edilib. (BBC.com)