“Ağdam şəhəri əvvəlki arxitektura elementləri daxil olmaqla mütəxəssislər tərəfindən bərpa olunacaq. “
Bunu Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev media qurumları və QHT rəhbərləriin, müstəqil jurnalistlərin və ictimai fəalların işğaldan azad olunmuş Ağdam şəhərinə təşkil olunmuş səfəri zamanı Turan-a açıqlamasında deyib.
Martın 13-də yerli media və QHT rəhbərlərindən, bloger və ictimai fəallardan ibarət qrup erməni işğalından azad olunmuş Ağdam rayonuna səfər edib. Nümayəndə heyətini səfərin təşkilatçısı, Azərbaycan prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev müşaiyət edib. Ağdama 6 avtobusda 130-a yaxın təmsilçi gedib. Əvvəlcə jurnalistlər və QHT rəhbərləri Ağdam rayonunun Baş Qərvənd kəndində dəmiryolu ətrafında minatəmizləmə prosesi ilə tanış olublar və mina partlayışını müşahidə ediblər.
Daha sonra səfər edənlərə Ağdam rayonu ərazisində ermənilərin hərbi istehkamları göstərilib. Vaxtı ilə Uzundərədə yerləşmiş İkinci Şəhidlər Xiyabanının yerlə yeksan olmuş məzarlığı, Ağdam şəhərinin girişində 1991-ci ildə partladılmış avtovağzalın, eləcə də Çörək muzeyi, Qarabağ xanlarının abidələr kompleksi və İmarət qəbisiristanlığının, İmarət stadionunun qalıqları jurnalistlərə və QHT rəhbərlərinə nümayiş etdirilib.
Dağıdılmış, işğaldan azad olunduqdan yenidən məzarları tapılaraq bərpa olunan Birinci Şəhidlər Xiyabanına da jurnalistlər baş çəkiblər. Ağdama təşkil olunmuş səfər çərçivəsində jurnalistlər və QHT sədrləri həmçinin damı dam üstə qalmayan Ağdam şəhərinin Mərkəzi meydanında olublar, dağıdılmış Dram Teatrının və İcra hakimiyyətinin binasının dağıntılarını izləyiblər.
Şəhərdə yeganə salamat bina olaraq qalmış Cumə Məscidinin binasında, eləcə də Şahbulaq qalasında da jurnalistlər və QHT sədrləri olublar. Onlara məlumat verilib ki, bu binaların digərlərinə nisbətən sağ qalmasının səbəbi ermənilərin Cümə məscidinin minarələrindən şəhəri müşahidə üçün etmələri olub. Ermənilər Qarabağ xanı Pənahəli xanın mülkü Şahbulaq qalasının tarixini və adını saxtalaşdıraraq Tiqranakert abidəsi kimi qonaqlara nümayiş etdirmək məqsədi ilə saxlayıblar.
Prezidentdin köməkçisi Hikmət Hacıyev bizimlə söhbətində bildirib ki, Ağdam şəhərinin bərpası üzrə işlər aparılmaqdadır.
“Möhtərəm Cənab Prezidentin müvafiq sərəncamına uyğun olaraq qərargah təsis olunub. Və bu qərargahın rəhbəri Azərbaycan Respublikası Prezident Administrasiyasının rəhbəridir. Qərargah çərçivəsində 17-dən artıq işçi qrupu fəaliyyət göstərir. Bu işçi qruplarından biri şəhərsalma məsələlərini özündə ehtiva edir. Müasir şəhərsalmanın, urban planlaşdırmanın bütün elementləri ehtiva olunmaqla belə bir işlər aparılmaqdadır. İşğaldan azad olunmuş ərazilərin rekonstruksiyası və yenidən qurulması prosesində ilkin və ən vacib şərt minalardan və partlamamış sursatlardan ərazilərin təmizlənməsidir. Bundan sonrakı mərhələlərdə quruculuq və digər işlər həyata keçiriləcək. Şəhərsalma planlaşdırılması çərçivəsində şəhərin əvvəlki arxitektura elementləri daxil olmaqla mütəxəssislər tərəfindən işlənməsi həyata keçirilir.
Hikmət Hacıyev həmçinin Ağdamda da “ağıllı kənd”, “ağıllı şəhər modelindən istifadə olunacağına dair sualımıza da cavab verib. O bildirib ki, Zəngilanın Ağoğlan kəndinə tətbiq edilmiş pilot modelin nəticəsində bunu söyləmək mümkün olacaq.
“Bəzən Azərbaycan mətbuatında, sosial şəbəkələrdə bu məsələ müzakirə olunur. “Smart city”, “smart village” dedikdə bu heç də hər şeyin İT texnologiyası, “silikon valley” deyəcəyimiz anlayış demək deyil. Yəni smart həyat tərzidir. Bu kənd təsərrüfatına, şəhər həyatının müxtəlif sahələrinə tətbiq oluna bilər. Təbii ki konsepsiya budur. Pilot layihə kimi artıq Zəngilanın Ağoğlan kəndi seçilib. O pilot modelin əsasında digər kəndlərimizə də tətbiq olunması ehtimal oluna bilər”. –0—