İqtisadi tənəzzül qapıdadır? Donald Trump-ın Azərbaycan da daxil olmaqla 100-dən çox ölkəyə taarif tətbiq etməsi özü ilə bu sualı da gətirdi.
Onun qərarından sonra dünya bazarlarında mis və neft qiymətlərinin düşməsi baş verdi, səhmlər, əmtəə birjaları, banklar dəyər itirdi.
Mis və neft, səhmlər, əmtəə birjaları, banklar və ixrac – iqtisadiyyatın möhkəmliyini təyin edən barometrlərdir.
Təhlilçilər deyirlər ki, birjalarda səhm qiymətlərinin düşməsi hər zaman səfalət vəd etmir. Ancaq səhmlərin dəyər itirməsi dünya birjalarındakı aparıcı şirkətlərin gələcək mənfəətlərini əsaslı şəkildə yenidən qiymətləndirməsi deməkdir. Bu, həm də o deməkdir ki, bazarlar artan tariflərin fonunda xərclərin artacağını və mənfəətin azalacağını gözləyir.
Bəs, bütün bunların Azərbaycana təsiri nə ola bilər?
İqtisadi təhlilçi Rövşən Ağayev deyir ki, “beynəlxalq ticarətin şərtləri köklü şəkildə dəyişir” və bu məqamda “resurs gəlirlərinin yaratdığı arxayınçılıq və təkəbbür ağır fəlakətlər gətirə bilər”.
Və qlobal tənəzzül başlasa, enerji bazarında ucuzlaşmalar, maliyyə bazarındakı çalxantılar Azərbaycan iqtisadiyyatını ayaqda saxlayan neft-qaz gəlirlərinin azalması fonunda ölkəyə “xeyli böyük itkilər gətirə bilər”.
“Neft Fondu və Mərkəzi Bankın ehtiyatları xarici aktivlərə yatırılıb. Maliyyə bazarlarında eniş olsa, Neft Fondu və Mərkəzi Bankın valyuta ehtiyatları ilə alınan aktivlərin bir hissəsi dəyərini itirə bilər”, Rövşən Ağayev vurğulayıb.(BBC.com)