Azərbaycan Beynəlxalq Bankın keçmiş rəhbəri Cahangir Hacıyevin xanımı Zamirə Hacıyevanın Londondakı malikanəsi əlindən alınıb.
Onun Britaniyadakı qolf klubu da müsadirə olunub, bu ölkənin mediası yazıb. Britaniya hökuməti müsadirə olunan əmlakın satışından əldə etdiyi məbləğin bir hissəsini Azərbaycana qaytaracaq, hökumətdən BBC-yə bildirilib.
Britaniyanın Milli Cinayət Agentliyi deyib ki, Zamirə Hacıyeva bu dəbdəbəli əmlakı Azərbaycanda “külli miqyasda dələduzluq və mənimsəmə, saxta uçot və çirkli pulların yuyulması yolu ilə dövlət bankının talanması nəticəsində” əldə edib.
Zamirə Hacıyeva məhkəmə boyu ittihamları qəbul etməyib. O, Britaniya məhkəməsində deyib ki, əri bank sədri olmazdan öncə, uğurlu biznesləri sayəsində müstəqil var-dövlət qazanmış qanuni iş adamı olub.
Məhkəmə ondan mübahisə obyekti olan var-dövlətinin qanuni maliyyə mənbəyini göstərməyi tələb edib.
Əvvəlki məhkəmələrdə Hacıyevaya aid aktivlərin ümumi məbləği 26 milyon funtdan çox, təxminən 56 milyon manat dəyərləndirilib.
Zamirə Hacıyeva ilə razılaşmaya əsasən, əmlaklar satılarkən, təxminən 18 milyon funt-sterlinq, yəni təxminən 40 milyon manat Britaniya dövlətinin nəzarətində olacaq.
Hacıyevaya əmlakların hərracla satışından əldə edilən məbləğin 30 faizi veriləcək.
70 faizdən isə Milli Cinayət Agentliyinin xərcləri çıxılacaq və sonra yerdə qalan vəsait Azərbaycana qaytarılacaq.
“Böyük Britaniya hökuməti beynəlxalq qanunvericilik çərçivəsində korrupsiya ilə əldə edilmiş aktivlərin Azərbaycana qaytarılmasına sadiqdir”, Britaniya hökumətindən BBC News Azərbaycancaya bildiriblər.
Lakin indiki məqamda Azərbaycana qaytarılacaq məbləğin ümumi dəyərini ehtimal etmək çətindir, BBC-yə bildirilib.
Zamirə Hacıyeva ona görə razılığa gedib ki…
Hacıyevanın hüquqlarını qoruyan Gherson vəkillik şirkətinin açıqlamasına görə, Zamirə Hacıyeva ona görə razılaşmaya gedib ki, onu müdafiə etmək mümkün olmayıb.
Azərbaycan hökuməti Cahangir Haciyevdən lazım olan məlumatları almağa “qəsdən imkan yaratmayıb”, Haciyevanın vəkilləri deyib.
Məhkəmə boyu iş üçün potensial əhəmiyyət kəsb edən məlumatlar Azərbaycanda həbsdə saxlanan Cahangir Hacıyevdə olub, Gherson şirkətinin yaydığı açıqlamada deyilir.
“Böyük Britaniyada işin davam etdiyi müddət ərzində Azərbaycan hakimiyyəti Hacıyevaya və onun Böyük Britaniyalı vəkillərinə Azərbaycanda həbsxanada olan cənab Hacıyevlə görüşə bilərəkdən icazə verməyib.
Bundan əlavə, Azərbaycan hakimiyyəti cənab Hacıyevin azərbaycanlı vəkillərinin Milli Cinayət Agentliyinin irəli sürdüyü iddiaları əks etdirən sənədləri nəzərdən keçirməsi və şərh verməsi üçün ona aparmasına mane olub”.
Məlumatda həmçinin deyilir ki, sənədləri cənab Hacıyevə aparmaq cəhdləri də baş tutmayıb: “ona yemək verilməyib və tibbi müalicəsi təmin edilməyib”.
BBC Azərbaycanca Azərbaycan hökumətindən bu iddialara hələlik cavab ala bilməyib.
Gherson şirkəti onu da bildirib ki, bu səbəblə Avropa İnsan Hüquqları Məhkəməsinə iki müraciət edilib.
Zamirə Hacıyevanın vəkilləri onu da deyiblər ki, “o və ailəsi artıq öz həyatlarına davam edə bildikləri üçün xoşbəxtdilər”.
Zamirə Hacıyevanın Harrods xərci
Zamirə Hacıyeva 2006-2016-cı illər ərzində Londonun məhşur mağazası Harrodsda təxminən 35 milyon manat xərcləməsi ilə dünya mediasının diqqətini çəkib.
Bu, günə təxminən 7-8 min manat deməkdir.
O, çay və qəhvəyə təxminən 50 min, meyvə və tərəvəzə 21 min, Godiva şokoladlarına 69 min manat xərcləyib, Britaniya mediası məhkəmə sənədlərinə istinadən yazıb.
Məhkəmədə o da aşkar olunub ki, Hacıyeva bu 10 il ərzində oyuncaq mağazasında təxminən 545 min manat xərcləyib.
Bundan başqa, o bu illər ərzində on minlərlə manatlıq zinət əşyası və geyim-gecim alıb. (BBC.com)