Azərbaycanda medianın durumu ilə bağlı ciddi irəliləyişlər nəzərə çarpmır. Jurnalistlər fiziki və psixoloji təzyiqlərə, cinayət təqiblərinə məruz qalmaqda davam edirlər, Media Hüququ Qrupunun hazırladığı “Birinci yarımildə Azərbaycanda medianın hüquqi vəziyyəti” adlı araşdırmada deyilir.
Rəsmi mənbələrə görə, Azərbaycanda qeydiyyata alınmış KİV-lərin sayı beş mindən çoxdur, lakin real fəaliyyət göstərən KİV-lər xeyli azdır, araşdırmada deyilir.
Mətbuatın özünütənzimləmə funksiyasını yerinə yetirməli olan Mətbuat Şurası əslində bu missiyanı yerinə yetirmir və praktikada hökumət tərəfindən nəzarət edilir ki, bu da KİV azadlığına mənfi təsir göstərir.
2021-ci ildə yaradılmış Medianın İnkişafı Dövlət Agentliyi KİV-ə öz sələfi Dövlət Dəstəyi Fondundan o qədər də fərqlənmir.
“Əgər Fond yalnız qəzet və jurnalları dəstəkləyirdisə, Agentlik İnternet nəşrlərini də maliyyələşdirməyə başlayıb. Nəticədə, əgər əvvəllər dövlətin asılılığı altına qəzetlər düşürdüsə, indi onlayn nəşrlər də düşür”, – hesabatda bildirilir.
İlin birinci yarısında jurnalistlərə qarşı ən azı 30 fiziki və psixoloji təzyiq halı qeydə alınıb.
Bununla əlaqədar Tovuz rayonunda azyaşlı qızın qətlə yetirilməsi mövzusunu araşdıran jurnalist Aytən Məmmədovaya hücum daha çox rezonans doğurub.
Bundan əlavə, ilin əvvəlində Baş Prokurorluq bir sıra saytların rəhbərlərinə xəbərdarlıq edib.
İcmal dövründə jurnalistlərə qarşı “diffamasiya araşdırması” davam edib.
Quba rayonundan jurnalist Cəmil Məmmədli 1,5 islah işlərinə məhkum edilib, KİM Tv Youtube kanalının aparıcısı Abid Qafarov isə 1 il müddətinə azadlıqdan məhrum edilib.
Bloger Rəşad Ramazanov narkotik maddələrin qanunsuz dövriyyəsi ittihamı ilə həbs edilib.
Qafarov və Ramazanovla yanaşı, jurnalistlər Polad Aslanov, Elçin Məmməd və bloger Aslan Qurbanov da həbsxanadadır.
İcmal dövründə məzmunu KİV-in dövlət tənzimlənməsinə tam tabe edilməsinə yönəldilmiş “Media haqqında” qanun qüvvəyə minib, hesabatda deyilir.
Qanunun ekspertizasını aparan Avropa Şurası Venesiya Komissiyası belə qənaətə gəlib ki, Avropa Şurası ölkələrində media haqqında belə bir qanun tətbiq edilməməlidir.
Sonda araşdırmada bir sıra tövsiyələr irəli sürülüb.
Əsasən media haqqında qanuna yenidən baxılması təklif olunur.
Bundan əlavə, jurnalistlərə qarşı fiziki və psixoloji təqiblərlə bağlı bütün halların araşdırılması tövsiyə olunur.
Həmçinin onların informasiya toplamasının qarşısının alınması və buna mane olan halların operativ araşdırılması, diffamasiyaya görə cinayət cəzasının ləğv edilməsi zəruridir.
Media Hüququ Qrupu hüquqşünas- ekspertlər Ələsgər Məmmədli və Xalid Ağalıyev tərəfindən təsis edilib və Azərbaycanda ifadə azadlığının təşviqinə yönəlib.