İyunun 10-da Avropa Şurası Nazirlər Komitəsi jurnalistlərin və fəalların işləri ilə bağlı Avropa İnsan Hüquqları Məhkəməsinin qərarlarının icrası barədə Azərbaycanla bağlı iki qətnamə qəbul edib.
Qətnamələrdən biri araşdırmaçı jurnalist Xədicə İsmayılovanın şəxsi həyatına və işgüzar nüfuzuna və ifadə azadlığına hörmət hüququnun pozulması ilə bağlı Məhkəmənin qərarı ilə bağlıdır.
Şikayət jurnalistə qarşı hədələr və onun intim kadrlarının internetdə, eləcə də jurnalistin hakimiyətyönlü KİV-də “hökumət əleyhinə qərəzli mövqeyi” və “əxlaqsız davranışı” barədə materialların yayılması ilə əlaqədardır.
Lakin Azərbaycan hakimiyəti jurnalistə qarşı cinayətləri araşdırmayıb.
Avropa Şurası Nazirlər Komitəsi hakimiyəti Xədicə İsmayılovaya qarşı törədilmiş cinayət əməllərinin effektiv araşdırılması, günahkarların məsuliyyətə cəlb olunmasına çağırıb.
Bundan başqa, Nazirlər Komitəsi hakimiyətə, jurnalistlərə qarşı cinayətlərlə bağlı tədbirlərin görülməsini, bu əməllərin onların peşə fəaliyyəti ilə mümkün əlaqəsinin araşdırılmasını təklif edib.
Nazirlər Komitəsi Azərbaycan hakimiyətinin üzərinə Nazirlər Komitəsinin bu ilin dekabrında keçiriləcək iclasında görülmüş tədbirlər barədə məlumat vermək öhdəliyi də qoyub.
İkinci qətnamə isə “Anar Məmmədlinin qrupu” işi ilə bağlıdır. Bu iş üzrə 2013-2016-cı illərdə həbs edilmiş 9 fəalın və jurnalistin (Anar Məmmədli, İntiqam Əliyev, Xədicə İsmayılova (2), Leyla və Arif Yunuslar, Bayram Məmmədov (mərhum), Qiyas İbrahimli, Məmməd Əzizov və Şahin Novruzlu) işləri toplanıb.
Avropa İnsan Hüquqları Məhkəməsi bu işlərdə onları cəzalandırmaq və susdurmaq məqsədilə cinayət qanunvericiliyindən sui-istifadə edildiyini, İnsan hüquqlarının və əsas azadlıqların müdafiəsi haqqında Konvensiyanın 5-ci və 18-ci maddələr üzrə hüquqlarının pozulduğunu tanıyıb.
Nazirlər Komitəsi ərizəçilərə kompensasiyanın ödənildiyini qeyd edərək, eyni zamanda onların tam bəraət almadığını və üzərlərindən məhkumluğun götürülmədiyini bildirib.
Bununla əlaqədar Nazirlər Komitəsi Azərbaycan hakimiyətini presedentlər, əsasən siyasətçi İlqar Məmmədovun işi üzrə presedent nəzərə almaqla, sözügedən şəxslərin barəsində ittiham hökmlərini və bütün mənfi hüquqi nəticələri ləğv etməyə çağırıb.
Nazirlər Komitəsi qeyd olunan işlərə yenidən baxacağı üçün Azərbaycan hakimiyətinə təklif olunub ki, avqustun 1-dək görülmüş tədbirlər barədə məlumat verilsin.