Bakıda Fəvvarələr meydanında bəzi ictimai-siyasi fəallar və jurnalistlər “Kriminal dövlət istəmirik” şüarı ilə aksiya keçiriblər.
Bir neçə gün qabaq jurnalist Aytən Məmmədovaya qarşı hücum olub. Aytən Məmmədova bu hücumu özünün peşə fəaliyyəti ilə əlaqələndirir. Bir müddət əvvəl isə ictimai fəal Bəxtiyar Hacıyev naməlum şəxlər tərəfindən oğurlandığını açıqlayıb.
Bundan sonra bəzi ictimai fəallar – hüquq müdafiəçiləri, jurnalistlər, siyasətçilər tələb ediblər ki, hakimiyyət tənqidçilərinə qarşı zorakılığa son qoyulsun və bu zorakılığa yol verənlər cəzalandırılsın.
Daxili İşlər Nazirliyi Aytən Məmmədovaya və Bəxtiyar Hacıyeva qarşı hücumla bağlı istintaq aparıldığını bildirib.
Bir saatdan çox davam edən aksiyada iştirakçılar “Öldürmə ədaləti, dayandır cinayəti”, “Mafiya dövlət istəmirik” şüarlarını səsləndiriblər.
Polis aksiya başlamazdan əvvəl bəzi iştirakçıları saxlayaraq oradan uzaqlaşdırıb.
Aksiya iştirakçıları təkid ediblər ki, onlar Fəvvarələr meydanından Daxili İşlər Nazirliyinin binasına sarı yürüş edəcəklər və burda bəyanatlarını səsləndirəcəklər.
Polis əvvəlcə buna imkan verməyib və qarışıqlıq yaranıb, aksiyaya gələnlərin hamısının bir araya gəlməsinə imkan verməyib və ayrı-ayrı yerlərdə dairəyə alaraq sədd qurub.
Beləcə, aksiya iştirakçılarından ibarət iki dairə yaranıb və hər ikisindən də şüarlar səsləndirilib.
Bir müddət sonra polis aksiya təşkilatçılarına öz bəyanatlarını Daxili İşlər Nazirliyinin binasının yaxınlığında səsləndirməyə imkan verib.
Bəyanatı səsləndirən hüquq müdafiəçisi Gülnarə Mehdiyeva deyib ki, onlar son vaxtlarda ictimai-siyasi fəallara, jurnalistlərə qarşı edilən zorakılıqların cəzasız qalmasına etiraz edirlər. Onlar tələb edirlər ki, bu cinayətlər dayandırılsın.
DİN aksiyada saxlanılanların olmadığını bildirib.
“Aksiya zamanı heç bir insident qeydə alınmayıb. Bəyanat oxunuşu ilə başa çatan aksiyada saxlanılan olmayıb”, – DİN Mətbuat xidmətinin KİV və ictimaiyyətlə əlaqələr şöbəsinin rəisi Elşad Hacıyev Facebook vasitəsiylə bildirib.
Mayın 8-də, jurnalist Aytən Məmmədova yaşadığı binanın liftinə daxil olarkən naməlum şəxsin hücumuna məruz qalıb. Bundan əvvəl deputatlığa keçmiş namizəd Bəxtiyar Hacıyev oğurlanaraq, təhdid olunduğunu deyib. Fəallar hücumları peşə fəaliyyəti ilə əlaqəndirirlər.
DİN hadisələrlə bağlı araşdırmaya başladığını bildirib.
Sərhədsiz Reportyorlar (RSF), Human Rights Watch, Amnesty İnternational kimi beynəlxalq təşkilatlar ifadə azadlığının məhdudlaşdırılması, ölkədə azad və müstəqil medianın olmaması, tənqidi məqalələr yazan jurnalistlərin işinə maneələr törədilməsi və təhdid olunması kimi məsələlərə görə Azərbaycanı tənqid edir.
Azərbaycan hökuməti bu tənqidləri təkzib edir və ölkədə media azadlığına, ictimai-siyasi fəaliyyətə hər hansı maneə olmadığını bildirir. (bbc.com)