Almaniyanın Koblenz şəhər məhkəməsi Suriya xüsusi xidmət orqanlarının keçmiş polkovniki Ənvər Raslan barəsində ittiham hökmü çıxarıb.
Xarici mediayanın məlumatına görə, 58 yaşlı Ə.Raslan qətllərdə və işgəncələrdə iştirakda təqsirli bilinərək əfv istəmə hüququ olmadan ömürlük azadlıqdan məhrumetmə cəzasına məhkum edilib.
Məlumatda bildirilir ki, Ənvər Raslan 2011 və 2012-ci illərdə Dəməşqin “yer üzündə cəhənnəm” adlandırılan, gizli Əl-Xətib həbsxanasında həbslərə, dindirilmələrə və işgəncələrə rəhbərlik edib. O, 27 məhbusu öldürməkdə, ən azı 4000 məhbusa isə işgəncə verməkdə təqsirli bilinib.
Məhkəmə prosesində 80 şahid dindirilib. Şahidlər həbsxanada məruz qaldıqları zorakılıqlardan danışıblar. Onlar Ə.Raslanın Əl-Xətib həbsxanasındakı 251 saylı sorğu-sual bölməsinə rəhbərlik etdiyini bildiriblər.
Koblenz məhkəməsinin sədri Anne Kerber şahidlərin “Suriya rejiminin qorxusuna” baxmayaraq ifadə verdiklərini deyib:
“Əl-Xatibin məhbuslarına aclıq və havadan məhrum olmaq da daxil olmaqla vəhşicəsinə işgəncələr verilib. Onları döyüblər, biləklərindən asıblar, elektroşokla işgəncə veriblər və yandırıblar. Onlar böyük psixoloji təzyiq altında olublar. Çoxları buna dözməyib, dəli olub və ya intihara cəhd edib”.
Eyni zamanda, bəzi şahidlər Suriyada qalan yaxınlarının həyatından qorxaraq hələ də məhkəmədə danışmaqdan imtina ediblər. Digərləri isə çıxışları zamanı üzlərini gizlədiblər və ya məhkəmə zalına pariklərdə gəliblər.
Ənvər Raslan 103 gün davam edən məhkəmə prosesində heç bir söz deməyib. O, hökmü sakit qarşılayıb.
Ə.Raslanın vəkilləri qərardan apellyasiya məhkəməsinə şikayət edəcəklərini deyiblər.
Qeyd edək ki, Ənvər Raslan barəsində çıxarılan ittiham hökmü Bəşər Əsəd rejiminin yüksək rütbəli məmuruna qarşı ilk belə məhkəmə qərarı olub. 2021-ci ilin fevral ayının əvvəlində Koblenz məhkəməsi Ə.Raslanın tabeliyində olanlardan biri, Suriya kəşfiyyatının zabiti Eyad əl-Qəribi insanlığa qarşı cinayətlərdə iştirak etdiyinə görə 4 il 6 ay müddətinə azadlıqdan məhrum edib.
Alman polisi Ənvər Raslanı 2019-cu ilin fevralında həbs edib. 2012-ci ildə Ə.Raslan ölkəni tərk edərək İordaniyaya qaçıb, orada Suriya müxalifətinə qoşulub və hətta 2014-cü ildə Cenevrədə Suriya üzrə ikinci sülh konfransında iştirak edib. 2015-ci ildə Ə.Raslan və ailə üzvləri Almaniyadan sığınacaq alıb.
“Le Monde” qeyd edir ki, Ə.Raslan Almaniyadakı digər suriyalı qaçqınlar tərəfindən də tanınıb. Hələ 2017-ci ilin avqustunda Raslan müharibə cinayətlərində şübhəli bilinən suriyalının işində şahid qismində dindirilib. Dindirmə zamanı o, işgəncə konveyerindəki rolundan danışıb.
“Human Rights Watch” təşkilatının hüquq müdafiəçiləri Koblenz məhkəməsinin qərarını alqışlayıblar.
Almaniyanın ədliyyə naziri Marko Buşman Koblenz məhkəməsinin digər ölkələr üçün nümunə olacağına ümid etdiyini bildirib: “Ümid edirəm ki, digər hüquq dövlətləri də buna əməl edəcəklər. İnsanlığa qarşı cinayət törətmiş insanlar sığınacaq tapmamalıdırlar”.
Hüquq müdafiəçiləri və media suriyalı zabitin məhkəməsini “tarixi hadisə” adlandırıb.