Bu ilin noyabrında Qətərdə keçiriləcək futbol üzrə dünya çempionatına etiraz edənlərin sayı getdikcə artır.
Belə ki, 2010-cu ildə Qətər DÇ-nin ev sahibliyini qazananadan sonra qeyri-adi və dəbdəbəli arenaların tikintisi zamanı Hindistan, Pakistan, Nepal, Banqladeş və Şri-Lankadan olan 6500-dən çox miqrant həlak olub. Buna görə də ölkələr, tanınmış şəxslər və dünya çempionatında iştirak edəcək komandalar tikinti işlərində insan hüquqlarının pozulmasına etiraz ediblər.
Norveç və Almaniya kimi dövlətlər 2021-ci ilin martında keçirilən beynəlxalq seçmə oyunlarında Qətərin 2022-ci il Dünya Çempionatına ev sahibliyi etməsi ilə birbaşa bağlı etirazlarda iştirak edərək insan hüquqlarını müdafiə ediblər. Hər iki ölkə dünya çempionatının Qətərə verilməsinin FİFA-nın ən pis addımı kimi dəyərləndirib.
Norveç yığması Cəbəllütariq və Türkiyəyə qarşı keçirdiyi DÇ seçmə mərhələ oyununda üzərinə “Meydanda və meydandan kənarda insan hüquqları” yazılmış köynəklərlə çıxıblar. Yığmının çalışdırıcısı Stale Solbakken etirazın səbəbini belə açıqlamışdı: “Məqsədimiz FİFA-ya bu cür hadisələrdə daha sərt qaydalar müəyyənləşdirməsi barədə etirazdır”.
Almaniya yığması isə İslandiya ilə matçdan əvvəl “İnsan hüquqları” yazılan köynəklər geyiniblər.
Hollandiya yığması da FİFA-ya və aidiyati qurumlara etiraz edib. Baş məşqçi Frank de Bur bununla bağlı deyib: “Mundiala vəsiqə əldə etsək də, ora gedib-getməyəcəyimiz barədə düşünəcəyik. Hamı bilir ki, Qətərdə baş verənlər biabırçılıqdır. Əslində, DÇ-ni boykot etmək doğru deyil, gedib orada etiraz etmək daha yaxşıdır”.
“Mançester Yunayted”in tanınmış futbolçusu Erik Kontana da DÇ-nin Qətərə verilməsinə etiraz edib: “Budəfəki dünya çempionatı məni heç də maraqlandırmır. Mənim üçün bu, real bir DÇ deyil. Baxmayacam. Başa düşürəm ki, futbol bir biznesdir. Lakin düşünürdüm ki, futbol hər kəsin şans əldə edə biləcəyi bir yerdir. Amma Qətər bir futbol ölkəsi deyil. Mən 90-cı illərdəki ABŞ və Cənubi Afrika kimi ölkələrdə futbolu inkişaf etdirmək məqsədilə DÇ-nin təşkil edilməsinə də qarşı deyildim. Ancaq bu sadəcə pul mövzusudur və onların stadionları tikmək üçün insanlara qarşı davranışları dəhşətdir. Minlərlə insan ölüb və biz hələ bu çempionatı qeyd edəcəyik”.
FİFA rəsmiləri etirazlara cavab olaraq belə bir açıqlama verib: “FİFA dünya çempionatının hazırlıqları üçün gedən tikinti işlərində qəzaların tezliyi digər tikinti şirkətlərinin gördüyü böyük layihələrlə müqayisədə aşağı olub”.
