51 yaşlı İtaliya şahzadəsi Cakomo Bonanno di Linquaqlossa 35 yaşlı belaruslu sevgilisi Tatyana Yaşenkonu məhkəməyə verib.
Buna səbəb qadının ondan bahalı hədiyyələr istəməsi olub.
2019-cu ildə şam yeməyində tanış olan cütlük bundan sonra münasibətlərə başlayıblar. Ötən ilin dekabrında isə şahzadə sevgilisinə qarşı məhkəmə iddiası qaldıraraq, onun sadəcə olaraq bahalı hədiyyələrə görə yanında olduğunu iddia edib. O, bildirib ki, əvvəlki evliliyinin dağılması nəticəsində travma keçirib və bu səbəbdən ağıllı qərarlar verə bilmir. T.Yaşenko isə bu vəziyyətindən istifadə edərək ona bahalı hədiyyələr aldırıb.
Şahzadə Tatyanadan verdiyi hər şeyi geri qaytarmasını tələb edir. O, qadını dünya turuna çıxardığını, birlikdə Monte Karlo, Dubay və Maldiv adalarını ziyarət etdiklərini deyib.
“Times”ın məlumatına görə, şahzadə sevgilisinə Romanın mərkəzində mənzil, dəyəri 90 min dollardan çox olan “Mersedes”, bahalı zinət əşyaları və 20 min dollardan çox pul verib. Ümumilikdə şahzadənin sevgilisi üçün aldığı hədiyyələrə 500 min dollardan çox pul xərclədiyi güman edilir. Bəzi məlumatlara görə, məbləğ bir milyon dolları da keçə bilər.