Qazaxıstanda nəqliyyat vasitələri üçün maye qazın kəskin bahalaşmasından soonra başlayan etiraz aksiyalarının qarşısını ala bilməyən hökumət istefa verməyə məcbur olub.
Qazaxıstan Prezidenti Kasım-Jomart Tokayev yanvarın 5-i hökumətin istefasını qəbul edib.
İndiki hökumət üzvləri yeni kabinet formalaşanadək vəzifələrinin icrasını davam etdirəcəklər.
İndiyə qədər Baş nazirin birinci müavini olan Alixan Smailov müvəqqəti olaraq Qazaxıstanın Baş naziri vəzifəsini icra edəcək.
Ölkədə ictimai təhlükəsizliyi təmin etmək, vətəndaşların hüquq və azadlıqlarının bərpa olunması məqsədilə Prezident Kasım-Jomart Tokayev Almatı şəhəri və Manqistau vilayətində fövqəladə vəziyyət rejiminin tətbiq edilməsi ilə bağlı sərəncam imzalayıb.
“Unian” agentliyinin verdiyi məlumata əsasən, həmin ərazilərdə fövqəladə vəziyyət rejimi yanvarın 5-dən 19-na qədər davam edəcək. Almatı şəhərində fövqəladə vəziyyət rejimi zamanı 23:00-dan 07:00-a qədər komendant saatı da tətbiq olunacaq.
Xatırladaq ki, yanvarın 2-dən etibarən Qazaxıstanda qazın bahalaşmasına görə kütləvi etiraz aksiyaları keçirilir.