Özbəkistanın Ədliyyə Nazirliyi İsveçrə Federal Məhkəməsinin mərhum keçmiş prezident İslam Kərimovun hazırda həbsdə olan qızı Gülnarə Kərimovanın offşor şirkətinin hesabında aşkarlanan 300 milyon dollara yaxın vəsaitinin müsadirə edilməsi barədə qərarını alqışlayıb.
Qeyd edilib ki, həmin vəsaitin 293 milyon dolları əsas benefisiarı Gülnarə Kərimova olan “Takilant Ltd.” şirkətinin hesabında aşkar edilib. Ölkənin Ədliyyə Nazirliyi bəyan edib ki, İsveçrə məhkəməsinin bu qərarı həmin pulların Özbəkistana qaytarılmasında da sonrakı danışıqlar üçün imkanlar açır.
Nazirlik məhkəmənin qərarına əsasən vəsaitin 70 milyon dollarının “Takilant Ltd.”-yə qaytarıla biləcəyini də bildirib.
Məhkəmənin şirkətə məxsus pulların əhəmiyyətli hissəsini müsadirə etməsinə baxmayaraq Gülnarə Kərimovanın vəkilləri qərarı “qismən qələbə” adlandırıblar. Vəkillər bildirirlər ki, məhkəmə onların müdafiə etdiyi şəxs barədə Özbəkistanda çıxarılmış hökmlərdən heç birini tanımayıb, çünki bu hökmlər Kərimovanın əsas insan hüquqlarının pozulması ilə bağlı olaraq çıxarılıb.
Qeyd edək ki, məhkəmənin hökmü barədə İsveçrə mətbuatı ötən həftə yazıb. Bildirilib ki, ölkənin federal cinayət məhkəməsi Gülnarə Kərimova ilə bağlı şirkətin 293 milyon dollarını müsadirə etməyə qərar verib. “Takilant Ltd.” şirkətinin İsveçrədə beş bank hesabı aşkarlanıb və həmin hesablarla bağlı neçə vaxtdır təhqiqat gedir. Şirkətdən müsadirə edilən pulların ümumi məbləğinin 350 milyon dollar olduğu qeyd edilib.
“Swissinfo” nəşri isə yazıb ki, həmin vəsaitin əhəmiyyətli hissəsi müsadirə edilir, çünki həmin vəsait Gülnarə Kərimova və onun köməkçisi ilə əlaqəlidir. Bu şəxslər isə İsveçrədə çirkli pulların yuyulmasında təqsirli biliniblər. Amma məhkəmə hökmünə əsasən 70 milyon dollar “Takilant Ltd.” şirkətinə geri qaytarılmalıdır. Çünki istintaq bir neçə şirkətlə əlaqəli olan həmin vəsaitin cinayət yolu ilə əldə edildiyinə dair sübutlar tapa bilməyib.
Xatırladaq ki, Gülnarə Kərimova Özbakistanın Daşkənd məhkəməsinin 2018-ci ildə çıxardığı hökmlə 13 il 4 ay müddətinə azadlıqdan məhrum edilib. O, hazırda Daşkənd vilayətindəki qadın həbsxanasında cəza çəkir. G.Kərimova korrupsiyada, çirkli pulların yuyulmasında, mütəşəkkil cinayətkar birlik yaratmaqda təqsirli bilinib.
Özbəkistan hakimiyyəti onun xarici bank hesablarındakı pullarını ölkəyə qaytarmaq üçün mübarizə aparır. Lakin korrupsiya yolu ilə əldə edilərək xarici offşorlara daşınan pulları geri qaytarmaq hüquqi baxımdan heç də asan məsələ deyil. G.Kərimovanın İsveçrədə dondurulan aktivlərinin ümumi dəyəri 800 milyon dollardan çoxdur.