Bakı Ağır Cinayətlər Məhkəməsində “Azərxalça” ASC-nin keçmiş sədri, barəsində cinayət işi başlanandan sonra vəfat etmiş Vidadi Muradovun cinayət işi üzrə məhkəmə prosesi davam etdirilib.
Hakim Əfqan Hacıyevin sədrliyi ilə keçirilən məhkəmə iclasında şahid ifadələri dinlənilib.
Öncə “Azər-İlmə” MMC-nin direktoru işləyən Xəqani Talıbov şahid qismində ifadə verib. Məlum olub ki, o, direktor olana qədər şirkətdə çayçı işləyib: “Vidadi Muradov ilə qohum deyiləm, amma qohumdan yaxın idik. Hətta deyim ki, can-ciyər idik. Buna görə də mənə kömək etdi, direktor oldum. Vidadi Muradovun oğlu Aydın Muradov da mənim müavinimdir”.
Dövlət ittihamçısı (prokuror) onun təhsilini soruşub və nəyə görə Vidadi Muradovun onu direktor təyin etdiyini soruşub. Şahid bildirib ki, ali təhsili yoxdur: “Dediyim kimi mərhumla can-ciyər idik, ona görə də məni direktor təyin etdi. Hazırda da orada direktor işləyirəm”.
Daha sonra Vidadi Muradovun evində və müəssisələrində təmir işləri aparan şirkətin icraçı direktoru Yaşar Ələkbərov şahid qismində ifadə verib:
“Təmir zamanı 800 min manatdan artıq vəsait xərclənib. 2018-ci ildə “Azərxalça”nın inşaat işlərində iş aparmaq üçün təkliflərimizi verdik. Bununla bağlı tender də keçirilməmişdi. “Azərxalça” ilə müqaviləni mən bağlamışam. Bundan sonra 13 müəssisədə aparılan işlərdə icraçı direktor olmuşam. İstintaq zamanı verdiyim ifadəni də təsdiq edirəm. İş həcmində olan çatışmazlıqlarla da razı deyiləm”.
Daha sonra özəl şirkətlərdən birində drektoru işləyən Vüqar Yusifov ifadə verib. O bildirib ki, hazırda “Azərxalça” tərəfindən sifariş verilmiş 973 min manatlıq işin icrası davam etdirilir.
Məhkəmənin növbəti iclası dekabrın 15-də davam etdiriləcək.
Qeyd edək ki, Vidadi Muradov bu ilin yanvarında həbs edilib. Onkoloji xəstəlikdən əziyyət çəkdiyi üçün oktyabrın 30-da ev dustaqlığına buraxılıb, noyabrın 5-də isə evində vəfat edib.
V.Muradov Cinayət Məcəlləsinin 179.4-cü (mənimsəmə xüsusilə külli miqdarda ziyan vurmaqla törədildikdə) maddəsi ilə ittiham olunurdu. O, vəzifədə olduğu müddətdə 3.5 milyon manat vəsaiti mənimsəməkdə şübhəli bilinir. Məhkəmə V.Muradovun 30 milyon manatlıq əmlakına həbs qoyub.
Onu da qeyd edək ki, V.Muradovun digər oğlu Cavid Muradov Sabunçu Rayon Polis İdarəsinin rəisidir.