ABŞ-da yaşayan Cənubi Azərbaycanlı iş adamı Rza Zərrabın Mayami şəhərindəki lüks villası və dəbdəbəli həyatı barədə yeni faktlar ortaya çıxıb.
R.Zərrab Mayamidə “Coconut Grove” adlı bölgədə “Miami Herald” qəzetinin müxbirlərinin obyektivlərinə tuş gəlib.
O, 3,6 milyon dollar dəyərində evdə yaşayır. Müxbirlər R.Zərrabın açıq havada gəzərkən mobil telefonunda yüksək səslə türkcə danışdığını və “Cadillac” markalı avtomobilə minərək uzaqlaşdığını bildiriblər.
Qəzet R.Zərrabın ABŞ-da at yarışlarının təşkilində “Richard Ferrari” adı ilə iştirak etdiyini də yazıb.
Bundan başqa, onun dəbdəbəli at fermasına 300 min dollar dəyərində olan Sonata MF adlı at gətirdiyi və bu atın ölkə çempionu olduğu da bildirilir.
Rza Zərrabın qeyd edilən adla yanaşı, “Aaron Goldsmith” və “Richard Kaplan” adlarından da istifadə etdiyi, İsveçrə istehsalı, dəyəri yüz minlərlə dollar olan “Richard Mille” saatından istifadə etdiyi, xeyli arıqladığı da bildirilib.
Qeyd edək ki, Rza Zərrab 2016-cı ildə İrana qarşı tətbiq edilən embarqoları pozmaqda ittiham edilərək ABŞ-da həbs edilib. O, 2017-ci ildə sərbəst buraxılıb.
Rza Zərrab türkiyəli müğənni Ebru Gündeşlə evli olub, onların Alara adlı qızı var.
