Avropa İnsan Hüquqları Məhkəməsi (AİHM) bu gün Azərbaycanla bağlı növbəti qərarını elan edib.
Məhkəmə Seçkilərin Monitorinq Mərkəzi və başqaları Azərbaycana qarşı işində ərizəçilərin iddia etdikləri pozuntuları tanıyıb.
Bu məhkəmə işi QHT-lərin qeydiyyatı ilə bağlı idi. Ərizəçi təşkilat və onun təsisçiləri Anar Məmmədli və Bəşir Süleymanlı mərkəzin dövlət qeydiyyatına alınmasının yubadılmasının və qeydiyyatın ləğv edilməsinin qanunsuzluğundan şikayət etmişdilər.
SMM-in təsisçiləri mərkəzin dövlət qeydiyyatına alınması üçün 2006-2008-ci illərdə Ədliyyə Nazirliyinə 6 dəfə müraciət edib. ƏN sənədlərin qanunvericiliyə uyğun tərtib edilmədiyi əsası ilə qeydiyyatdan imtina edib.
SMM 2008-ci ilin fevralında dövlət qeydiyyatına alınsa da aprel ayında nazirlik mərkəzin qeydiyyatının ləğv edilməsi tələbi ilə Xətai Rayon Məhkəməsində iddia qaldırıb. İddia edilirdi ki, mərkəz rəsmi ünvanın, təsisçilər siyahısındakı dəyişikliklərin, nümayəndəliklərinin açılması barədə məlumatları nazirliyə təqdim etməyib. Məhkəmə nazirliyin iddiasını təmin edib, yuxarı məhkəmələr isə həmin qərarı qüvvədə saxlayıb.
AİHM qərarında SMM-in qeydiyyatının yubadılmasının və sonra ləğv edilməsinin qanunsuzluğundan şikayət edən ərizəçiləri haqlı hesab edib. SMM-lə bağlı hüquqi prosedurların həm qeydiyyatın yubadılması, həm də qeydiyyatın ləğv edilməsi kontekstində Konvensiyanın 11-ci maddəsinin pozuntusu ilə müşayət olunduğu bildirilib.
Məhkəmə cavabdeh olan dövlətin bu işdə Konvensiyanın 34-cü maddəsi üzrə öhdəliklərini yerinə yetirmədiyinə qərar verib.
Məhkəmənin qərarına əsasən, hökumət qərar qəti olduqdan sonra ərizəçilərə mənəvi zərərin əvəzi olaraq 4500, hüquq xərclərinə görə 1500, digər məsrəflərə görə 600 avro təzminat ödəməlidir.