Gəncə Dövlət Dram Teatrının rejissoru, Azərbaycan Respublikasının Xalq artisti Vaqif Şərifov vəfat etdi.
Gəncə Dövlət Dram Teatrında Xalq artisti ilə vida mərasimi keçirilib.
Vida mərasimində bir sıra rəsmi şəxslər, mərhumun ailə üzvləri, şəhər ictimaiyyəti və sənət yoldaşları iştirak ediblər.
Xalq artistinin 60 ildən çox çalışdığı teatrın səhnəsinə qoyulan cənazəsi önünə əklil və gül dəstələri düzülüb, mərhumun xatirəsi bir dəqiqəlik sükutla yad edilib.
Xalq artisti Gəncə şəhər Fəxri xiyabanında dəfn edilib.
Qeyd edək ki, Vaqif Abdulla oğlu Şərifov 12 avqust 1943-cü ildə Gəncədə anadan olub. 1960-cı ildən teatrda əmək fəaliyyətinə başlayıb. 1967-ci ildə Azərbaycan Dövlət İncəsənət İnstitutunun Rejissorluq fakültəsini bitirib. 1967-1974-cü illərdə Gəncə Dövlət Dram Teatrında rejissor, 1974-1977-ci illərdə Sumqayıt Dövlət Dram Teatrında baş rejissor, 1977-1981-ci illərdə Ağdam Dövlət Dram Teatrında baş rejissor, 1981-1984-cü illərdə yenidən Gəncə Dövlət Dram Teatrında quruluşçu rejissor, 1984-cü ildən 1998-ci ilədək həmin teatrda direktor və bədii rəhbər vəzifəsində çalışıb.
Müxtəlif illərdə Nazim Hikmətin “Domokl qılıncı”, Hüseyn Cavidin “Maral”, Cəfər Cabbarlının “Almaz”, “Yaşar”, A.Baranqanın “İctimai rəy”, Y.Saloviçin “Qəribə dilənçi”, Anarın “Şəhərin yay günləri”, Elçinin “Qatil”, Süleyman Sani Axundovun “Eşq və intiqam”, İsmayıl Şıxlının “Dəli Kür”, Orxan Kamalın “Yad qızı”, Nüşabə Məmmədlinin “Unutmaq istəyirəm”, Sahib İbrahimlinin “Sadığın toyu” və s. pyeslərə quruluşlar verərək, ümumilikdə 120-dən artıq tamaşaya səhnə həyatı bəxş edib.
Tanınmış rejissor “Qanun dəllalı” (Mirzə Məhəmməd Axundzadə) tamaşasının quruluşuna görə Azərbaycan Teatr Xadimləri İttifaqının təsis etdiyi “Qızıl dərviş” mükafatını qazanıb. 1992-ci ildə respublikanın “Əməkdar incəsənət xadimi” və 2014-cü ildə “Xalq artisti” fəxri adlarına layiq görülüb.
Xatırladaq ki, ürəyində problem yaranan və vəziyyəti ağırlaşan 78 yaşlı xalq artisti oktyabrın 2-də Gəncə şəhər 3 saylı xəstəxananın reanimasiya şöbəsinə yerləşdirilmişdi.
