“Facebook”un qurucusu Mark Zukerberq sosial şəbəkələrin işində yaranmış bir neçə saatlıq problem səbəbindən 6,6 milyard dollar itirib.
Bu barədə “Forbes” yazır.
Milyarder sosial şəbəkələrin işindəki problemdən sonra dünyanın ən zəngin insanları siyahısında 6-cı pilləyə düşüb.
Qeyd edək ki, istifadəçilər “Facebook”, “Instagram” və “WhatsApp” tətbiqlərinə girişdə problemlə üzləşiblər. Nəqliyyat, Rabitə və Yüksək Texnologiyalar Nazirliyi problemin lokal deyil, qlobal xarakter daşıdığını bildirib.
Sosial platformaların ardınca bəzi ölkələrdə istifadəçilər “Twitter” sosial şəbəkəsinə, “Google” axtarış sisteminə, “Amazon” platformasına, “TikTok” tətbiqinə daxil olmaqda da problem yaşayıblar. Ekspertlər problemin yaranmasına səbəb kimi daxili təxribat və kiber hücumunu göstəriblər.
“Facebook”, “Instagram” və “Whatsapp”ın 1 saatdan çox işləməməsi onların 160 milyon dollardan çox vəsait itirmələrinə səbəb olub. Gündəlik 2 milyarda yaxın aktiv istifadəçisi olan “Facebook”un səhmlərinin dəyəri günortadan sonrakı hərraclarda 5.5% azalıb.