Baş Prokurorluğun Ağır Cinayətlərə Dair İşlər üzrə İstintaq İdarəsinin keçmiş müstəntiqi dələduzluqda təqsirləndirilərək hakim qarşısına çıxarılıb və məhkəmə zalında həbs edilib.
Nəsimi rayon Məhkəməsində keçirilən sonuncu məhkəmə iclasında 1985-ci il təvəllüdlü keçmiş müstəntiqə hökm oxunub. Hökmə əsasən Orxan Hacıyev 2 il müddətinə azadlıqdan məhrum edilib. Ev dustaqlığına olan O. Hacıyev məhkəmə zalında qandallanaraq həbs edilib.
İttihama görə, Orxan Hacıyev Xaçmazda baş verən qətlin istintaqı zamanı pul alıb. O, yaşadığı evdə qətlə yetirilmiş İlqar Məmmədovun ölümüylə bağlı cinayətin üstünün açılması, şübhəli şəxsin İnterpol xəttiylə axtarışa verilməsindən ötrü mərhumun oğlu və xanımından 5000 manat pul alıb.
Qeyd edək ki, Orxan Hacıyev həmin qətllə bağlı araşdırma aparan istintaq qrupunun rəhbəri olub. O, istintaq qrupunun üzvlərilə birlikdə Xaçmaza ezam olunub.
Mərhum İ. Məmmədovun oğlu Vüqar Məmmədov bildirib ki, rayon prokurorluğunda istintaq qrupunun üzvü olan İlqar Babayev ondan pul istəyib, o, deyib ki, istintaqçıların rayonda qalması, kirayə və s. məsələlərə xərcləri çıxır, onu ödəmək lazımdır. Məmmədovun sözlərinə görə, o gətirib prokurorluğun binasında istintaq qrupunun rəhbərinə 2000 manat pul, bir blok da siqaret verib.
Elə həmin ərəfədə təqsirləndirilən şəxslərdən Qalib Kərimov həbs edilib. Bir müddət sonra hadisədə şübhəli bilinən Vüsal Rüstəmovun ölkədə olmadığı müəyyənləşib. Zərər çəkmişin sözlərinə görə, onun İnterpol xəttiylə axtarışa verilməsi üçün Hacıyevin özü ondan pul istəyib. Bu dəfə də anası Arzu Orucova aparıb 3000 manatı istintaq qrupunun rəhbərinə verib.
Daha sonra istintaqın gedişindən və atası öldürüləndə evdən götürülən pulun 1.5 milyon yox, 80 min göstərilməsindən narazı qalan zərər çəkmiş Vüqar Məmmədov müstəntiq Orxan Hacıyevdən şikayət etməyə başlayıb. O, Baş Prokurorluğun İstintaq İdarəsinin kliminalistika şöbəsinin rəhbəri Pərviz İbayevin (hazırda Nizami rayonunun prokurorudur) qəbulunda olub və O. Hacıyevin ondan 5000 manat aldığını deyərək, pulu geri istəyib. Pərviz İbayev isə ona şikayət etməyə əsas olmadığını, pulun qaytarılacağını deyib. Bir neçə gün sonra Orxan Hacıyev “İnşaatçılar” metrosunun yaxınlığında 3000 manatı qaytarıb. O, V. Məmmədovdan qalan 2000 manatı bağışlamağını istəyib. V. Məmmədov sonra bir daha Pərviz İbayevin qəbulunda olub. P. İbayev O. Hacıyevə zəng edəndən sonra O. Hacıyev qalan 2000 manatı da dərhal qaytarıb.
Məhkəmədə ifadə verən O. Hacıyev qarşı tərəfin ona böhtan atdığını bildirib:
“Xaçmazda olanda “Bolkart” kreditinin vaxtı çatmışdı. Maaş kartım ezamiyyətə gedəndə evdə qalmışdı. Vüqar kabinetimdə olanda SMS gəldi ki, 315 manat borc yaranıb, mən də qeyri-iradi deyindim. Soruşdu ki, nə məsələdi, əvvəl demədim, sonra dedim. Vüqar dedi ki, işin üstünün açılması üçün nə qədər əziyyət çəkmisən, rayona qonaq gəlmisən, o pulu tapacam. Mən razılaşmasam da, ertəsi gün Vüqa Məmmədov bir blok siqaret və 300 manat pulla gəldi. Siqaretin pulunu verdim, 300 manatı isə borc şərtilə götürdüm.
O. Hacıyev qeyd edib ki, qarşı tərəf cinayət vaxtı evlərindən 1.5 milyon manat oğurlanmasıyla bağlı təqsirləndirilən şəxslərə ittiham verilməsini istəyirdi. O isə işin hallarına uyğun məbləği yazmışdı. Buna görə aralarında narazılıq yaranıb: “İkinci təqsirləndirilən şəxsi Qazaxıstandan ekstradisiya etdirmişdim. Ona da ilkin istintaqda 80 min dollarla ittiham elan olunmuşdu. Bunu biləndə Vüqar məndən şikayətlər etməyə başladı. Vüsalın Rusiyada yaşayan atası Arifi də məsuliyyətə cəlb etməyimi istəyirdi, deyirdi ki, Arif pulu ödəyəcək, bölərik. Mən razılaşmadım”.
V. Məmmədov prokurorluğa diskdə O. Hacıyevlə aralarındakı söhbətin gizli səs yazısını təqdim edib. Keçmiş müstəntiq buna cavab olaraq deyib ki, həmin yazı birinci dəfə “İnşaatçılar” metrostansiyasının yaxınlığında 200 manatı ona qaytaranda yazılıb.
O. Hacıyev onun işini aparan istintaqdan da narazı qalıb. O, məhkəmədə ifadəsində bildirib ki, Korrupsiyaya Qarşı Mübarizə İdarəsində istintaq obyektiv aparılmayıb. Ona görə də müstəntiqə ifadə verməkdən imtina edib: “İşdən əsassız xaric olundum, cinayət işi başlandı. Müstəntiq Rəfael Süleymanova 300 manatı borc aldığımı demişdim. O bildirmişdi ki, bunu ifadəmdə yazsam, rüşvət kimi qiymətləndirilə bilər, daha ağır ittiham verilər. Mən 9 il prokurorluqda işləmişəm, dələduzluqla borcun fərqini yaxşı bilirəm. Korrupsiyaya Qarşı Mübarizə İdarəsində istintaq tam qanunsuz aparılıb”.
Nəsimi rayon Məhkəməsinin hakimi Azər Tağıyev sabiq müstəntiqin dediklərini özünümüdafiə cəhdi kimi qiymətləndirib. İstintaq və məhkəmə dövründə azadlıqda olan Hacıyev hökm elan ediləndə məhkəmə zalında həbs olunub.
Xaçmazdakı qətlə görə Vüsal Rüstəmov, Firudin Axverdiyev və Qalib Kərimov həbs edilib. Məhkəmənin hökmü ilə Qalib Kərimov və Vüsal Rüstəmov 20 il, Firudin Axverdiyev isə 18 il müddətinə azadlıqdan məhrum edilib. İttihama görə, təqsirləndirilən şəxslər cinayətkar dəstə yaradaraq, Xaçmazda quldurluq, oğurluq cinayətləri ilə məşğul olublar. Onlar rayon sakini Nəzakət Hacıyevanın evinə girərək onu zəhərləyib öldürüblər və evindən 10 min manat pul götürüblər. Daha sonra həmin mənzili yandırıblar. Qadının meyiti də yanıb.
Dəstə üzvlərinin digər cinayət əməli barədə ittihamda yazılır ki, onlar əvvəlcədən hazırladıqları plan üzrə topdansatış mərkəzi olan İlqar Məmmədovun evinə daxil olublar. İlqar Məmmədovu bıçaqla qətlə yetirərək evindən 289 min manat pul və qızılları götürüblər. Qalib Kərimov özünü qismən təqsirli bilib, Firudun Axverdiyev və Vüsal Rüstəmov isə özlərini təqsirli bilməyiblər.
Hadisə ötən il iyunun 16-da Xaçmazda baş verib. Ərzaq mallarının topdan satışıyla məşğul olan İlqar Məmmədovun meyiti evinin həyətində tapılıb. Polis və prokurorluq orqanları əməkdaşlarının həyata keçirdikləri əməliyyat-axtarış tədbirləri nəticəsində İ.Məmmədovun qarət məqsədilə qətlə yetirildiyi məlum olub.
İşlə bağlı şübhəli bilinən Xaçmaz rayon sakinləri Qalib Kərimov və Firudin Axverdiyev həbs edilib. Dəstənin digər üzvü V.Rüstəmov isə ölkədən qaçıb. 1984-cü il təvəllüdlü Rüstəmov Vüsal Arif oğlunun Rusiyaya, oradan da Qazaxıstana qaçması müəyyən edilib. O, Qazaxıstanda tutularaq Azərbaycana təhvil verilib.
Qeyd edək ki, Orxan hacıyev 9 il prokurorluq orqanlarında müstəntiq işləyib. Sonuncu vəzifəsi İstintaq İdarəsinin kriminalistika şöbəsinin prokuroru olub.
Onu da qeyd edək ki, O.Hacıyev Gəncə hadisələri ilə bağlı istintaq qrupunun üzvlərindən olub.
Gəncənin keçmiş icra başçısı Elmar Vəliyevə qarşı sui-qəsdə görə həbs olunan şəxslərin ailə üzvləri dövlət orqanlarına şikayətlərində Orxan Hacıyevin də adını çəkirlər. Onlar Hacıyevin istintaqı qərəzli apardığını, işgəncələrdə onun da iştirak etdiyini bildirirlər.