“Taliban”ın Əfqanıstanda hakimiyyəti ələ keçirməzdən əvvəl qadın hüquqları müdafiəsi üzrə fəal olan Taranom Seyidi gələcəyi ilə bağlı çox narahat olduğunu dilə gətirib.
“Taliban” rejimindən gizlənən T.Seyidi “CNN” müxbiri ilə söhbəti zamanı yaşadığı dəhşətlərdən danışıb.
Müxbir qadının yeganə “cinayəti”nin küçələrdə bərabər hüquqlarını tələb etmək olduğunu bildirib. Qadın döyülüb və təzyiqlərə məruz qalıb, “Taliban” qorxusu onu hər yerdə izləyir.
“Onlar bizə hədə-qorxu gəlməyə və gizlincə edam etməyə çalışırlar. Necə ki bunu mənim bir çox qadın dostuma ediblər. Mən ölümdən qorxmuram. Lakin onlar məni tapdıqda arzu edirəm ki, məni tez öldürsünlər. Əgər onlar ilk olaraq mənə işgəncə versələr, sonradan ləyaqətsiz şəkildə öldürəcəklər. Hər kəs şərəfli şəkildə ölməyi arzulayır”, – deyə T. Seyidi bildiirb.
T. Seyidi hazırda ailəsinin və zorakılıqdan xilas etdiyi uşaqların qayğısına qaldığı yeganə insan olduğunu deyib. Bununla belə, ölkədə qalmağın onun üçün ölüm riski daşıdığını deyib.
O, bildirib ki, onun gələcək taleyi kömək üçün müraciət etdiyi ABŞ, Böyük Britaniya, Kanada və digər ölkələrdən asılıdır. T.Seyidi ölkəni tərk edəcəyi halda da mübarizəsini davam etdirəcəyini bildirib.