Zığda yerləşən modul tipli xəstəxanada koronavirusdan müalicə olunan müğənni Səyyad Əlizadənin vəziyyəti ağır olaraq qalır.
Bu barədə ifaçının kürəkəni Razim Qarayev məlumat verib.
O, bildirib ki, ifaçı xəstəxanaya yerləşdirilən gündən komadadır və süni tənəffüs aparatına qoşulub.
S.Əlizadənin bacısı Prezidentə və Mehriban Əliyevaya videomüraciət edib.
Müraciətdə deyilir:
“Bütün Azərbaycanın ümid yeri, sevimli Prezidenti İlham Əliyev və hamıya kömək olan xanımlar xanımı Mehriban xanım, mən “Bəyaz gecələr”i xalqa sevdirən tanınmış müğənni Səyyad Əlizadənin bacısıyam. Səyyadım indi zülmətdədir. Sizdən kömək istəyirəm. Ümid yerim sizsiniz”.
Qeyd edək ki, S.Əlizadənin koronavirusa yoluxan xanımının müalicəsi palatada davam etidirilir. Onun vəziyyəti normaldır.