İyunun 4-də gecə saat 22 radələrində Kürdəmir rayonunda yerləşən “Nicat Plaza” şadlıq sarayında keçirilən toy mərasimində dava olub.
Belə ki, toyda Kürdəmir Rayon Məhkəməsinin katibi Yaşar Cəbiyevlə Kürdəmir Rayon Polis Şöbəsinin Cinayət Axtarış Bölməsinin baş əməliyyat müvəkkili, polis kapitanı Vüsal Kərimov arasında mübahisə yaranıb. Mübahisə nəticəsində dava-dalaş düşüb. Bu zaman polis əməkdaşı V.Kərimov məhkəmə katibi Y.Cəbiyevi vuraraq ona xəsarətlər yetirib.
Məhkəmə katibi baş vermiş hadisə ilə bağlı Kürdəmir Rayon Polis Şöbəsinə ərizə ilə müraciət edib.
Hadisə rayonun Qaraqocalı kənd sakini, bir müddət əvvəl narkotik vasitələrin qanunsuz dövriyyəsində şübhəli şəxs qismində saxlanılmış şəxsə görə baş verib. Belə ki, məhkəmə katibi Y.Cəbiyevin qonşusu olan şəxs saxlanıldıqdan sonra Y.Cəbiyev tanışı, polis kapitanı Vüsal Kərimovdan məsələnin müsbət həll edilməsini xahiş edib.
Lakin bir neçə gün keçməsinə baxmayaraq saxlanılan şəxslə bağlı yeniliyin olmadığını görən məhkəmə katibi polis əməkdaşı ilə bir yerdə iştirak etdiyi toyda ona bu məsələyə görə irad bildirib. Nəticədə tərəflər arasında mübahisə düşüb və dava olub.