Müsəlman Birliyi Hərəkatının sədri Tale Bağırzadənin həbsxanada aclıq aksiyasına başlayıb.
Bu barədə onun müavini Elçin Qasımov məlumat yayıb:
“Tale Bağırzadə iyunun 3-də cəza çəkdiyi Qobustan qapalı həbsxanasının rəhbərliyinə aksiya ilə bağlı yazılı bildiriş edib. O, aclıq etməsinə səbəb kimi son dövrlər polis idarələrində vətəndaşlara verilən işgəncələr fonunda allahın söyülməsini, təhqir edilməsini göstərib.
Tale Bağırzadə bütün bunları bəşəri dəyərlərin alçaldılması, inanca qarşı qəbul edilməz addım adlandırıb. O qeyd edib ki, bu cinayəti törədənlər cəzalanana qədər aksiyasını davam etdirəcək”.
Qeyd edək ki, T.Bağırzadə Bakı Ağır Cinayətlər Məhkəməsinin 25 yanvar 2017-ci il tarixli hökmü ilə 19 il müddətinə azadlıqdan məhrum edilib. Hökmə əsasən, o, həbsinin ilk 7 ilini Qobustan qapalı həbsxanasında çəkməlidir.
Xatırladaq ki, Tale Bağırzadə və digər inanclı şəxslər 2015-ci il noyabrın 26-da Nardaranda keçirilən xüsusi əməliyyat zamanı həbs ediliblər. Onlara qarşı Cinayət Məcəlləsinin 10 maddəsi ilə – terrorizm, qanunsuz silah saxlamaq, konstitusiya quruluşunun zorla dəyişdirilməsinə cəhd, polisə müqavimət göstərmək və s. ittiham irəli sürülüb.
Həbs edilənlər ittiham olunduqları maddələr üzrə özlərini təqsirli bilməyiblər, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində məruz qaldıqları işgəncələrdən danışıblar.
Onlara məhkəmə hökmü ilə 12 ildən 19 ilədək azadlıqdan məhrum etmə cəzası verilib.