Fövqəladə Hallar Nazirliyinin Dövlət Yanğın Nəzarəti Xidməti tərəfindən vətəndaşların müraciəti əsasında aparılmış plandankənar yoxlama zamanı Bakı şəhəri, Nizami rayonu, Babək prospekti, 2222-ci məhəllə ünvanında yerləşən “ENJOY” gecə əyləncə klubunda yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib. Belə ki, yoxlama zamanı obyektin normaya uyğun ehtiyat çıxış yolu ilə təmin edilmədiyi, əsas zalında döşəmə hissənin divar boyunca 40 sm hündürlüyündə taxta diktlərdən istifadə olunaraq üzərinin xalça ilə üzləndiyi, qapılarının təxliyə məqsədilə çıxış istiqamətində açılmadığı, avtomatik yanğınxəbərverici siqnalizasiya qurğusunun quraşdırılmadığı, ilkin yanğınsöndürmə vasitələri və odsöndürən balonlarla tam təmin olunmadığı, obyektin ehtiyat elektrik generatoru ilə təmin edilmədiyi müəyyən olunub.
Beləliklə, yanğın təhlükəsizliyi norma və qaydalarının tələblərinin pozulması faktları aşkar edildiyi üçün “ENJOY” gecə əyləncə klubunda işlərin və xidmətlərin göstərilməsinin dayandırılması barədə qərar qəbul edilib.
Vətəndaşlar Dövlət Yanğın Nəzarəti Xidmətinin bu qərarından razı qalıb, minnətdarlıqlarını birdiriblər.
Xatırladaq ki, bir müddət əvvəl Nizami rayonunun Keşlə qəsəbəsinin bir qrup sakini qəsəbənin Şəhidlər xiyabanının yaxınlığında “Enjoy” gecə klubunun açılmasına etiraz etmişdilər. Klubun qarşısına toplaşan sakinlər bunu xiyabanda uyuyan şəhidlərin ruhuna hörmətsizlik kimi qiymətləndirərək sözügedən obyektin bağlanmasını tələb etmişdilər.
