Dekabrın 1-də “Saleh Rüstəmliyə Azadlıq!” şüarı ilə bağlı keçirilən aksiya zamanı saxlanılan Milli Şuranın üzvü Tofiq Yaqubluya fiziki xəsarət yetirilməsi ilə bağlı cinayət işinin başlanmasının rədd edilməsi haqqında qərarın əsasları məlum olub.
Belə ki, bununla bağlı T.Yaqublu qərardan hissələrin fotolarını paylaşıb. Qərarda T.Yaqublunun özü özünə xəsarət yetirdiyi bildirilir:
“Tofiq Yaqublu bölmədə ora niyə gətirildiyini bildirərək özünü divarlara çırpıb, bəzən də əlləri ilə üzünə zərbələr vuraraq özünə xəsarət yetirməyə cəhd edib.
Onunla profilaktik söhbətlər aparılıb. Tofiq Yaqublu isə karantin qaydalarını pozmadığını deyərək otaqda qəflətən bir neçə dəfə öz yumruqları ilə üz nahiyyəsinə xəsarət yetirib. T.Yaqublu saat 17:45-də sərbəst şəkildə polis bölməsini tərk edərək gedib.
T.Yaqublu polis bölməsinə daxil olarkən, eləcə də polis bölməsini tərk edərkən üzərində hər hansı bir gözlə görünən xəsarət izi olmayıb. Hətta üz nahiyəsinə öz yumruğu ilə vurması nəticəsində qızartılar olsa da, bunu yaxından diqqətlə baxdıqda görmək mümkün olub.
Onu mitinq zamanı saxlayan polislər isə bildirib ki, onlar Tofiq Yaqublunun qollarından tutub polis bölməsinə təhvil verilməsi məqsədilə avtopatrul maşınına aparanda o müqavimət göstərmək məqsədilə özünü yerə çırpıb, hətta maşının qapısına üzünü vurub”.
T.Yaqublu qərarda yazılanlarla razılaşmadığını, qeyd edilənlərin yalan olduğunu bildirib.