İngiltərə və Uelsin Yüksək məhkəməsi Azərbaycanın ləğv edilmiş Milli Təhlükəsizlik Nazirliyinin keçmiş rəhbəri Eldar Mahmudovun övladlarının “El Periodico”, “Diario de Mallorca”, “Diario de Córdoba”, “Opinión de la Coruña” və “Regió7” ispan nəşrlərinə qarşı qaldırdıqları diffamasiya barədə iddialarını rədd edib.
E.Mahmudovun oğlu Anar və qızı Nərgiz 2020-ci ilin mayında “Prensa Lberica” media qrupuna daxil olan adı çəkilən beş ispan nəşrindəki məqalələrə görə məhkəmədə iddi qaldırıblar. Məqalələrdə keçmiş MTN rəhbərinin və onun ailəsinin Böyük Britaniya, İspaniya, Lüksemburqdakı çoxsaylı daşınmaz əmlakından və biznes aktivlərindən bəhs edilir. Həmin əmlakın Eldar Mahmudov nazir olarkən cinayət yoluyla qazandığı vəsaitlər hesabına əldə edildiyi qeyd edilir.
“El Periodico” qəzeti yazıb ki, Anar və Nərgiz Mahmudovların verdiyi şikayət təmin olunsaydı təhlükəli presedent yaradardı və informasiya azadlığını təhdid edərdi. Çünki iddiaçılar KİV-lərə qarşı onların aid olduğu yurisdiksiyadan kənarda iddia qaldırmışdılar. Yəni onlar ispan məhkəməsinə deyil, Britaniya məhkəməsinə müraciət etmişdilər. Bu da “Prensa Lberica” media qrupunu məcbur edib ki, onun üçün yad olan normativ-hüquqi bazada özünü müdafiə etsin və nəticədə ispan məhkəmələrində olduğundan daha çox xərc çəksin.
Buna görə də İngiltərə və Uelsin Yüksək məhkəməsi Mahmudovların iddiasını rədd edib. Məhkəmə belə qərarə gəlib ki, dərc edilən məqalələrin Britaniyada onların maraqlarına zərbə vurduğu barədə yetərli dəlillər yoxdur.
Lakin nədənsə iddiada Britaniyanın “The Observer” nəşri, “Finance Uncovered” və Organised Crime and Corruption Reporting Project kimi jurnalist araşdırmaları təşkilatları yer almayıb. Baxmayaraq ki, bu təşkilatlar Cayman National Bank-dan sızmış sənədlər əsasında Mahmudovların qanunsuz sərvəti barədə ispan nəşrləri ilə birlikdə araşdırma aparmışdı. Odur ki, Mahmudovların Britaniya nəşrləri ilə məhkəmə çəkişməsinə girməkdən çəkinməsi maraq doğurub.
Xatırladaq ki, həmin araşdırmada keçmiş MTN nazirinin ailə üzvlərinin Avropa ölkələri boyu səpələnmiş, ümumi dəyəri 100 milyon avrodan çox olan mülkləri, o cümlədən çoxsaylı ofşor şirkətlərindən bəhs edilirdi. Belə ki, Eldar Mahmudov nazir olarkən ölkədən xarici ofşorlara milyardlarla dollar çıxarıb.
Keçmiş MTN naziri Eldar Mahmudovun ailə üzvlərinin Avropadakı çoxsaylı mülklərindən bəzilərinin fotolarını təqdim edirik:
