Gədəbəyin həbsdə olan keçmiş icra başçısı Saleh Rüstəmovun azadlığa buraxılması ilə bağlı vəkilləri Aqil Layıc və Bəhruz Bayramov Nizami Rayon Məhkəməsinə ərizə ilə müraciət ediblər.
Bu barədə Aqil Layıc məlumat verib. Vəkil bildirib ki, S.Rüstəmov hər an koma vəziyyətinə düşə bilər:
“Saleh Rüstəmovun səhhətində olan ciddi problemlərə görə azadlığa buraxılması üçün ərizə rəsmi olaraq Nizami Rayon Məhkəməsinə təqdim olundu. Saleh bəy müalicə müəssisəsinə yerləşdirilib. Penitensiar Xidmətin Müalicə Müəssisəsi Nizami rayonu ərazisində yerləşdiyinə görə ərizəni həmin məhkəməyə təqdim etdik.
Saleh Rüstəmovun hazırda 3 ciddi xəstəliyi var. Böyrək çatışmazlığından da əziyyət çəkir. Ailəsinin məlumatına görə, bu gündən etibarən su içməyi də dayandıracaq. Hər an koma vəziyyətinə düşə bilər”.
Qeyd edək ki, Saleh Rüstəmov artıq 31 gündür aclıq aksiyası keçirir.
Xatırladaq ki, Saleh Rüstəmov I Qarabağ Müharibəsinin iştirakçısı olub. Gədəbəy rayonunun erməni təcavüzkarlarından təmizlənməsində və uğurlu Başkənd əməliyyatında fəal iştirak edib. Bir müddət Rusiyada yaşayan S.Rüstəmov 2018-ci ildə Bakıya gələn zaman həbs edilib və narkotik maddələri saxlamaqda ittiham edilərək həbs olunub. Sonradan cinayət işinə onun Rusiyada qeyri-qanuni sahibkarlıqla məşğul olması, gəlirlərini dövlətdən gizlətməsi ittihamları əlavə edilib.