Ukrayna parlamenti Krım tatar türkləri, karaimlər və krımçakların ölkənin yerli xalqı olaraq tanınmasını nəzərdə tutan qanun qəbul edib.
Ukrayna Prezidenti Vladimir Zelenskinin təklifi ilə “Ukraynanın yerli xalqları qanun layihəsi” ümumi iclasda səsverməyə qoyulub.
Səsverməyə qatılan 345 millət vəkilindən 325-i qanunun lehinə səs verib.
Qanuna görə tatar, karaim və krımçak xalqları Ukraynanın yerli xalqı olaraq tanınacaq.
Ölkədə yaşayan ruslar isə Ukrayna sərhədlərindən kənarda dövlətə malik olduqları üçün yerli xalq olaraq qəbul edilməyəcək.
Yerli xalqların assimilyasiya, etnik köklərinin, mədəni dəyərlərinin məhv edilməsi, zorla yurdlarından çıxarılmaları və köçürülmələrinə qarşı hüquqları təmin ediləcək.
Ukraynanın yerli xalqlarının mədəniyyət, təhsil, dil və məlumat əldə etmək hüquqları zəmanət altında olacaq.
Yerli xalqlar öz təhsil qurumlarını formalaşdıra biləcək, ya da digər təhsil qurumları ilə dillərinin, tarixlərinin, mədəniyyətlərinin öyrədilməsi məqsədilə əməkdaşlıq edə biləcək.
Onlar özlərini təmsil edən orqanlar vasitəsilə öz media qurumlarını qurmaq hüququ qazanacaqlar.
Qeyd edək ki, Krım tatarları 30 ildir bu qanunun qəbulunu gözləyirdi.