“Ağıllı kənd layihəsinə start verilir. İlk belə layihə işğaldan azad edilmiş Zəngilan rayonunun Ağalı kəndində icra ediləcək.
Şəhər planlaşdırılması üsrə mütəxəssis Fuad Cəfərli Turana müsahibəsində belə deyib.
Onun sözlərinə görə layihənin əsas məqsədi xidmətlərə əlçatanlığı təmin etmək, elektron xidmətlərdən istifadəni genişləndirmək, sirkular iqtisadiyyatı yatarmaq və kənd yerlərində davamlı inkişafı təmin etməkdir. Bura yeni texnologiyaların tətbiqi, yerli turizmin, qeyri-ənənəvi sahələrin inkişafı daxildir.
Mütəxəssisin bildirdiyinə görə, bu layihələrin həyata keçirilməsi böyük vəsait tələb edəcək. Layihələrin inkişaf etdirilməsi üçün həmin yaşayış məskənlərində yüksək ixtisaslı kadrlar yaşamalı və işləməlidir.
“Ağıllı” kənd layihələrində məqsəd həm də ondan ibarətdir ki, kənd yerlərində insanların şəhərdə əldə edə biləcəyi bütün xidmətlərə çıxışı olsun. İnsanlara kənddə pul qazanmaq, biznesini inkişaf etdirmək imkanı yaradılsın.
F.Cəfərlinin fikrincə, hətta şəhərlərdə xidmətə əlçatanlıq tam təmin olunmadığı halda, kəndlərdə bu işin necə yerinə yetiriləcəyi sual altındadır. Həmin kəndlərdə daha mobil olan elektron xidmətlərlə yanaşı effektli yerli idarəetmə institutları yaradılmalıdır.
Dünya təcrübəsində ‘Ağıllı şəhər’ layihələri tətbiq olunur. “Ağıllı kəndlər” ideyasına bənzər. Avropada yaxşı idarətetməyə misal olacaq təcrübələr yetərincədir. Həmin yaşayış məntəqələri bütün xidmətlərə əlçatanlığı təmin ediblər və dayanıqlı iqtisadiyyatları var-müsahibədə bildirilir.
Qeyd edək ki, “Ağıllı kəndlər” 2016-cı ildə Avropa İttifaqının ucqar ərazilərdə yerləşən kəndlərin inkişaf etdirlməsi üçün nəzərdə tutulan bəyannəməsi əsasında yaranan sənəddir.
Xatırladaq ki, Azərbaycanda ilk dəfə olaraq «Ağıllı kənd» layihəsi barədə məlumat 2018-ci ilin oktyabrında Prezident İlham Əliyevin Qax rayonuna səfəri zamanı verilib. Prezident işğaldan azad olunmuş Füzuli, Zəngilan, Laçın və Cəbrayıl rayonlarına səfəri zamanı bu ərazilərdə “ağıllı kənd” yaradılacağını deyib.