İnsan Hüquqları üzrə müvəkkili (Ombudsman) Səbinə Əliyevanın 2020-ci üzrə illik hesabat məruzəsi dövlət qurumlarına, Milli Məclisə təqdim olunub.
Ombudsman aparatının məlumatında bildirilir.
Martın 10-da hesabat-məruzə parlamentin İnsan Hüquqları Komitəsinin iclasında müzakirəyə çıxarılacaq.
Qeyd edək ki, məruzənin Ombudsman Səbinə Əliyevanın təqdim edəcəyi gözlənilir.
Bildirildiyinə görə, məruzədə məhkumların hüquqlarının genişləndirilməsi üçün Cəzaların İcrası Məcəlləsinə dəyişiklik təklif olunur. Ombudsman məhkumlar üçün videozənglərin təşkilini təklif edir.
Məhbuslara belə bir imkan yaradılmasının müsbət dəyişikliklərə səbəb olacağı bildirilir. Məhbusların ailə üzvləri, yaxınları ilə əlaqənin asanlaşmasının islaholunmaya, nəqliyyat xərclərinə qənaət, qadağan olunmuş əşyaların gizli şəkildə keçirilməsinin azaldılmasına kömək edəcək.
Qeyd edək ki, məhkumun ailəsiylə videogörüntü vasitəsilə əlaqə saxlamaq təcrübəsi xarici ölkələrdə geniş yayılıb. Videogörüntülü əlaqə effektiv təsir üsullarından sayılır.
Xatırladaq ki, “Azərbaycan Respublikasının İnsan hüquqları üzrə müvəkkili (ombudsman) haqqında” Azərbaycan Respublikası Konstitusiya Qanununun 14-cü maddəsinə uyğun olaraq, Ombudsman ölkədə insan hüquqlarının qorunması haqqında məruzə hazırlamalıdır. Qanuna əsasən, cari il bitdikdən sonra 2 aydan gec olmayaraq Ombudsman illik məruzəni Azərbaycan Respublikasının Prezidentinə təqdim edir və həmin məruzə ilə Milli Məclis qarşısında çıxış edir.
İllik məruzə, eyni zamanda Nazirlər Kabinetinə, Konstitusiya Məhkəməsinə, Ali Məhkəməyə və Baş prokurora göndərilir.