İnzibati Xətalar Məcəlləsinin 549-cu (Bələdiyyələrin fəaliyyətinə inzibati nəzarəti həyata keçirən orqanın fəaliyyətinə mane olma) maddəsinə əsasən, ötən il 138 bələdiyyə sədri inzibati məsuliyyətə cəlb edilib. 23 halda ciddi qanun pozuntuları aşkar edilərək toplanmış sənədlər istintaq orqanlarına göndərilib. Həmin materiallardan 10-u üzrə cinayət işi başlanılıb.
Bu barədə Milli Məclisin martın 9-da keçirilən iclasında Bələdiyyələrin fəaliyyətinə inzibati nəzarəti həyata keçirən orqanın illik hesabat məruzəsini təqdim edən Ədliyyə nazirinin müavini, II dərəcəli dövlət ədliyyə müşaviri Vilayət Zahirov bildirib.
Hesabata görə ötən il ərzində Ədliyyə Nazirliyində 79.858 bələdiyyə aktına inzibati nəzarət qaydasında baxılıb. Nəticədə 76.433 akt qanunvericiliyə uyğun hesab edilib.
Məlumata görə bələdiyyələrin fəaliyyəti ilə bağlı 3.206 müraciətə baxılıb və bu müraciətlərin 164-ü təmin edilib. Qanunvericiliyin tələblərinə zidd olan 3267 bələdiyyə aktının dəyişdirilməsi və ya ləğv edilməsi ilə bağlı aidiyyəti bələdiyyələrə müraciət olunub. Bu təkliflər əsasında 1666 akt ləğv edilib, 1384 akt dəyişdirilib. Bələdiyyələrin təmin etmədiyi 15 təklif üzrə məhkəmələrdə qaldırılmış iddialardan 2-si təmin edilib.
Xarıtladaq ki, Bələdiyyə qanunla müəyyən edilmiş ərazi hüdudları daxilində yerli özünüidarəetmə formasıdır. Yerli özünüidarəetmə, ərazi vahidi üzrə əhalinin və bu əhalini təmsil edən seçkili orqanların yerli əhəmiyyətli məsələlərin həlli üzrə fəaliyyəti deməkdir.
Azərbaycan Respublikasında ilk bələdiyyə seçkiləri 12 dekabr 1999-cu ildə keçirilibr. Ilk olaraq 2700 bələdiyyə yaradılıb, sonradan kiçik bələdiyyələrin birləşdirilməsi ilə onların sayı azalıb. Bələdiyyə seçkiləri beş ildən bir keçirilir. Sonuncu bələdiyyə seçkisi 2019-cu ildə olub.
Seçkilər günü 21 yaşı tamam olan və yaşı 21-dən yuxarı olan Azərbaycan Respublikasının vətəndaşları bələdiyyələrə üzv seçilə bilərlər.