Bu Maksdır. Sahibi Aynur Elgünəş jurnalist olduğu üçün tez-tez onu yaxınlarına etibar edib, səfərə gedir. Daha dəqiqi, həbs olunanadək, bu, belə olub.
Maksın iki yaşı var. O, körpəliyindən Aynurla yaşayıb.
Bu görüntülər ötən ilin oktyabrında çəkilib. Aynurun həbsindən təxminən iki ay əvvəl. Maks o zaman cəmi bir neçə günlük səfərə getmiş Aynurun yolunu gözləyirdi.
Bu video isə çəkilməzdən az əvvəl Aynur videozəng vurub, “Maks gəlirəm” dediyi üçün o, qapıda Aynuru gözləyirdi.
İndi Maks dekabrdan bəri, düz 7 aydır ki, Aynuru görmür.
Bir neçə gün əvvəl jurnalist Aynur Elgünəş ona itiylə görüşə icazə verilmədiyini açıqlayıb.
“Məni övladım bildiyim varlığa həsrət qoymağınız mübarizə metodu deyil, humanizmdən, insan və heyvan haqlarından uzaq addımdır”, – Jurnalist Penitensiar Xidmətə ünvanladığı açıq məktubunda yazıb.
Aynur iti ilə görüşə icazə verilməməsini “əsassız” adlandırıb.
“Tanıyan hər kəs bilir, mən onunla yaşayırdım və əsas ailə üzvüm hesab edirəm…Qanunvericilikdə onunla görüşməyimi qadağan edən heç bir müddəa yoxdur”.
Mənim itimlə görüşmək istəyim başqalarına gülməli görünə bilər, ancaq evində heyvan saxlayan hər bir mədəni insan üçün o, övlada bərabər varlıqdır”, – jurnalist bildirib.
Penitensiar Xidmət jurnalistin bu məktubu ilə bağlı açıqlama yaymayıb.
Aynur Elgünəş Meydan Tv-nin baş redaktorudur. O, 2024-cü ilin dekabr ayında qaçaqmalçılıq ittihamı ilə saxlanılıb.
Aynur Elgünəş bu ittihamı rədd edir, həbsini jurnalist fəaliyyətiylə əlaqələndirir. (BBC.com)