Rəsmilərin dediyinə görə, Rusiyanın Qazaxıstanla sərhədi yaxınlığında Tobol çayının keçdiyi Kurqan bölgəsində daşqınların ən yüksək həddə çatacağı gözlənilir.
RİA dövlət xəbər agentliyinin Rusiya Fövqəladə Hallar Nazirliyinə istinadən verdiyi məlumata görə, bazar günü sular 62 yaşayış məntəqəsi və 4300 evə təhlükə yaratdığına görə, su basmış ərazilərdəki yüzlərlə yaşayış binasından 7100-dən çox insan təxliyə edilib.
Keçən həftə daşqınlar başlayandan bəri 108 mindən çox insanın təxliyə olunduğu qonşu Qazaxıstanın Petropavlovsk şəhərində bazar günü sular daha 1000-dən çox evi su altında qoyduğu üçün 4500-dən çox insan məcburi təxliyə edilib.
Ural dağları ilə Sibirin qovuşduğu yerdə yerləşən bölgə administrasiyası Telegram mesajlaşma proqramında bildirib ki, Tobol çayı bazar ertəsi səhər saat 6-ya qədər dörd saat ərzində 23 sm qalxıb.
Tobol çayı adətən noyabrdan aprelə qədər donur və suyun yüksəlməsi yazda baş verir.
Lakin bu il qeyri-adi dərəcədə böyük miqdarda əriyən buz və qar çayların qalxmasına, Ural və Qazaxıstanda rekord daşqınlara səbəb olub. Kurqandakı leysan yağışları vəziyyəti daha da ağırlaşdırıb.
Daha əvvəl Kurqan vilayətinin rəhbəri Vadim Şumkov bölgəni cənubdan şimala bölən Tobolun sağ və sol sahillərinin aşağı hissəsindəki sular 600 sm səviyyəsinə çatdıqda daşqınların başlayacağı barədə xəbərdarlıq etmişdi.
Region rəsmilərinin Telegram kanalında bildirdiklərinə görə, daşqınlar Sibirin cənub-qərb hissəsindəki Tomsk vilayətində də evləri suyun altında qoyub.
Bazar ertəsi regionun inzibati mərkəzi olan Tomsk şəhəri yaxınlığında 140-a yaxın ev su altında qalıb, 84 nəfər təxliyə edilib. (Amerikanın səsi)