Bakı İnsan Hüquqları Klubu (BİHK) gözlənilən əfv sərəncamı ilə bağlı Azərbaycan prezidenti İlham Əliyevə və Əfv Məsələləri Komissiyasının sədri Samir Nuriyevə müraciət edib.
BİHK rəhbəri Rəsul Cəfərov Amerikanın Səsinə bildirib ki, Əfv Müstəqillik Günü – 28 May ərəfəsində gözlənilir.
Onun sözlərinə görə, Bakı İnsan Hüquqları Klubu müraciətində 38 nəfərin həbsdən azad edilməsini xahiş edir.
“Bu, 2016-2018-ci illərdə həbs olunmuş, işgəncələrə və əsassızz həbsə məruz qalmış “Tərtər İşi”nin fiqurantlarıdır. Bundan başqa, siyahıda “Gəncə işi” (2018-ci il) və “Tovuz işi” (2019-ci il) üzrə həbs olunmuş dindarlar, habelə müxalifət nümayəndələri və ömürlük həbs cəzası çəkən dörd nəfərin (üçü “XTPD işi” (1995) üzrə həbs olunanlar) adı var”, o qeyd edib.
Cəfərov bildirib ki, son aylarda həbs olunmuş “Abzas Media”, “Toplum TV” və “Kanal 13”ün jurnalistlərinə gəlincə, onlar hələlik istintaq altındadır, əfv isə artıq mühakimə olunmuş şəxslərə aid olduğuna görə siyahıda onların adları yoxdur.
Xatırladaq ki, aprelin 3-də prezident yanında Əfv Məsələləri Komissiyası işini bərpa edib. Komissiya ilk olaraq 100 müraciətə baxıb.
Hüquq müdafiə təşkilatları hazırda ölkədə 288 nəfəri siyasi məhbus kimi tanıyır. Rəsmi Bakı isə insanların iradəsinə görə təqib edilmədiyini və siyasi məhbusların olmadığını bildirir.