• 29 Fevral 2024 03:20

İsraillə HƏMAS arasında atəşkəs daha iki gün uzadılır

Noy 28, 2023

Qəzzada İsrail və HƏMAS arasında atəşkəsin daha iki gün uzadılacağı bəyan edilib.

Planlaşdırılan dörd günlük atəşkəs bazar ertəsi başa çatmalı idi və İsrailin daha çox fələstinli məhbusu, HƏMAS-ın isə daha çox girovu azad edəcəyi gözlənilirdi.

Altı həftəlik müharibədən sonra qüvvəyə minən ilkin razılaşmada HƏMAS tərəfindən 50 girovun azad edilməsi, İsrail tərəfindən 150 fələstinli məhbusun azad edilməsi və hərbi əməliyyatların dayandırılması nəzərdə tutulurdu.

Birləşmiş Millətlər Təşkilatı bazar günü axşam saatlarında ümumilikdə 39 israillinin, 117 fələstinlinin və 19 xarici vətəndaşın azad edildiyini bildirib.

Dörd günlük atəşkəsin təmin edilməsində vasitəçilik edən ABŞ, Misir və Qətər müddətin uzadılmasını müdafiə edənlər arasındadır.

“Bu, mənim məqsədimdir, bu, bizim məqsədimizdir. Bu fasiləni sabahdan sonra da davam etdirməkdir ki, biz daha çox girovların qayıtmasını və Qəzzada ehtiyacı olanlara daha çox humanitar yardım çatdırılmasını davam edə bilək”, ABŞ prezidenti Co Bayden bazar günü jurnalistlərə deyib.

Bayden həmçinin oktyabrın 7-də HƏMAS-ın İsrailə hücumu zamanı valideynləri öldürülən 4 yaşlı israilli amerikalı qızın azad edilməsini alqışlayıb.

Abigel Edan adlı qız İsrailin müxtəlif cinayətlərə görə həbs etdiyi fələstinliləri azad etməsi müqabilində HƏMAS-ın girovları azad etdiyi üçüncü gündə Beynəlxalq Qızıl Xaç Komitəsinə təhvil verdiyi 14 israilli və üç xarici vətəndaş arasında idi.

Ağ Evin bəyanatında deyilib ki, Bayden və Netanyahu bazar günü telefon söhbəti zamanı girovların azad edilməsindən danışıb, döyüşlərdəki fasilə və Qəzza zolağına əlavə humanitar yardımın artırılması məsələlərini müzakirə edib.

Müvəqqəti atəşkəs HƏMAS-ın oktyabrın 7-də İsrailə qəfil hücumu nəticəsində 1200 nəfərin ölümü və 240-a yaxın insanı girov götürülməsindən sonra münaqişədə ilk fasilədir. İsrail öz növbəsində HƏMAS-ı məhv edəcəyinə söz verərək, Qəzzanı havadan və qurudan hücumlara məruz qoyub. Fələstin rəsmilərinin dediyinə görə, hücumlar nəticəsində təxminən 40%-i uşaq olmaqla, 14 mindən çox insan həlak olub. (Amerikanın səsi)