Rusiya Qızıl Xaç Komitəsinin Qarabağ ermənilərinə göndərdiyi yardım TIR-ı Xankəndidədir

Rusiya Qızıl Xaç Komitəsinin (RQXC) Ağdam-Xankəndi yolu ilə Qarabağ ermənilərinə göndərdiyi yardım TIR-ı çərşənbə axşamı Xankəndiyə çatıb, Armenpress yazıb.

Yardım şənbə günü Azərbaycana daxil olsa da, bu günə qədər Bərdədə gözləməli olmuşdu.

Separatçı Dağlıq Qarabağ rəhbərliyi yaydığı bəyanatda vurğulayıb ki, Rusiya mənşəli yardımın əraziyə girişinə icazə veriblər və yardım “Rusiya istehsallı zəruri ərzaqdır”, Armenpress yazıb.

Azərbaycan Xarici İşlər Nazirliyi RQXC tərəfindən göndərilən yükün Azərbaycanla əlaqələndirilmiş şəkildə məhz Ağdam-Xankəndi yolu ilə keçməsini “bu yolun açılması istiqamətində müsbət addım və mühüm irəliləyiş” kimi qiymətləndirib”. Bu haqda qurumun çərşənbə axşamı yaydığı məlumatda deyilir

Azərbaycan XİN qeyd edir ki, Azərbaycan BQXK vasitəsilə Ağdam-Xankəndi və Laçın yollarından eyni vaxtda istifadə məsələsinə razılıq verib.

“Lakin bu razılığın həyata keçirilməsinə mane olan tərəf Ermənistan tərəfindən Qarabağ bölgəsində yaradılmış qondarma rejimdir”, Azərbaycan XİN bildirir.

Rəsmi Bakı bir daha bəyan edir ki, “Azərbaycan tərəfi Ağdam-Xankəndi yolu ilə paralel olaraq, Laçın sərhəd buraxılış məntəqəsində müvafiq olaraq sərhəd və gömrük prosedurlarına əməl etməklə, BQXK vasitəsilə yüklərin daşınmasına şərait yaratmağa hazırdır”.

Daha əvvəl Azərbaycan Prezidentinin köməkçisi Hikmət Hacıyev X (Twitter) hesabında yazıb ki, Rusiya Qızıl Xaç Komitəsinin Ağdam-Əsgəran yolu ilə Xankəndiyə aparacağı yardımla bağlı razılaşma BQXK-nin yardımı üçün “Ağdam-Xankəndi və Laçın-Xankəndi yolunun eyni vaxtda “açılması təklifi ilə qarışdırılmamalıdır”.

Çərşənbə axşamı həmçinin, Azərbaycan xarici işlər naziri Ceyhun Bayramov İsveçrə Konfederasiyasına işgüzar səfəri çərçivəsində Beynəlxalq Qızıl Xaç Komitəsinin (BQXK) prezidenti Miryana Spolyariç Eqqer ilə görüşüb.

Azərbaycan XİN-nin məlumatına əsasən, görüşdə “Azərbaycan qanunvericiliyinə və müvafiq prosedurlara əməl etməklə, BQXK vasitəsilə erməni sakinlərin ehtiyaclarının qarşılanması üçün Ağdam-Xankəndi və Laçın-Xankəndi yolundan paralel istifadənin zəruriliyi” qeyd olunub.

Eyni zamanda, “əldə olunmuş razılıqlara baxmayaraq, Ermənistanın və onun yaratdığı qondarma rejimin bu razılıqları kobud şəkildə pozması və hazırda Laçın yolundan gündəlik əsasda hər iki istiqamətdə erməni sakinlərin keçidinin təmin edildiyi halda, Ermənistanın “blokada” iddialarının əsassız olması” xanım Eqqerin diqqətinə çatdırılıb, Azərbaycan XİN bildirir.

“Rus sülhməramlılarının müvafiq icazəsi ilə Rusiya Qızıl Xaç Komitəsinin yük avtomabili bu gün səhər saat 07:00 radələrində Xankəndiyə yola düşüb”, – Azərbaycan Qızıl Aypara Cəmiyyətinin icraçı katibi Ceyhun Mirzəyev çərşənbə axşamı BBC Azərbaycancaya bildirmişdi.

Azərbaycan Qızıl Aypara Cəmiyyətinin Qarabağ erməniləri üçün apardığı 40 tonluq yardım TIR-larının isə 15-ci gündür ki, Ağdam- Xankəndi yolunda gözlədiyini deyən Ceyhun Mirzəyev BBC-yə onu da deyib ki, hazırda onlar vəziyyəti öyrənmək üçün Rusiya Qızıl Xaç Komitəsi nümayəndələrinin geri qayıtmasını gözləyirlər:

“Yəqin ki, günorta saat 2-yə qayıdarlar. Biz də Qarabağda vəziyyətin necə olduğunu öyrənmək üçün onların qayıtmasını gözləyirik”.

Rusiya Qızıl Xaç Komitəsinin şənbə günündən Xankəndiyə göndərdiyi yardım TIR-ı çərşənbə axşamına qədər Bərdədə Ağdam-Xankəndi yolu ilə hərəkət etmək üçün müvafiq icazə gözləyib.

Azərbaycanın rəsmi informasiya agentliyi Azərtac bazar ertəsi iddia edib ki, Beynəlxalq Qızıl Xaç Komitəsinin (BQXC) Rusiya Qızıl Xaç Cəmiyyətinə “təzyiqi nəticəsində humanitar yük Bərdə şəhərində ləngiyib”.

BQXC yaydığı açıqlamasında bu iddianı təkzib edərək Rusiya Qızıl Xaç Cəmiyyətinin əraziyə humanitar yardım daşımasına əngəl olmadıqlarını və ya siyasi məsələlərə müdaxilə etmədiklərini bildirib.

“Humanitar yardımın həyata keçirilməsi barədə qərarın verilməsi tərəflərin iradəsindən asılıdır”, – BQXC-ln yaydığı açıqlamada deyilir.

Bundan əvvəl, separatçı Dağlıq Qarabağ Respublikası rəhbərliyinin yaydığı bəyanatda bildirilmişdi ki, Rusiyanın yardımı “Ağdam yolu ilə çatdırılacaq və eyni zamanda Laçın dəhlizi ilə humanitar tranzitin bərpasına dair razılıq əldə olunub”, Armenpress yazıb.

Bəyanatda vurğulanıb ki, “DQR” Rusiya mallarının Əsgəran şəhəri vasitəsilə bölgəyə daxil olmasına “icazə vermək qərarına” gəlib.

ABŞ rəsmiləri Azərbaycanı Laçın dəhlizi ilə Ağdam-Xankəndi yolunu eyni vaxtda açmağa çağırmış, rəsmi Bakı buna müsbət cavab vermişdi.

Azərbaycan Prezidentinin köməkçisi Hikmət Hacıyev şənbə günü X (Twitter) hesabında həm də bildirmişdi ki, bazar günü Rusiyanın təşəbbüsü ilə Rusiya Qızıl Xaç Komitəsinin ərzaq yükü Ağdam-Əskəran yolu ilə Xankəndiyə gedəcək:

“Amma bu, ayrı razılaşmadır. Beynəlxalq Qızıl Xaç Komitəsinin [ərzaq yardımının] çatdırılması üçün Ağdam-Xankəndi və Laçın-Xankəndi yollarının eyni vaxtda açılması təklifi ilə qarışdırılmamalıdır. Belə ki, Azərbaycan Ağdam-Xankəndi və Laçın-Xankəndi yollarının eyni vaxtda açılmasının təmin edilməsinə “xoş niyyətlə” razılaşmışdı, amma qanunsuz rejim bundan imtina etmişdi”.

Hikmət Hacıyev əlavə edib ki, bununla belə, Laçın keçid-buraxılış məntəqəsində Azərbaycanın gömrük və sərhəd rejiminə əməl olunmalıdır.

Qarabağda yaşayan ermənilər bir neçə aydır ki, “Laçın yolunun bağlı olmasına görə” ərzaq çatışmazlığı ilə üzləşdiklərini bildirirlər. Rəsmi Bakı Laçın yolunun bağlı olmadığını bəyan edib və humanitar məqsədlər üçün Ağdam-Xankəndi yolunu təklif edib.

“Rusiya Qarabağ ermənilərinə yardım göndərib… Ağdam yolundan keçəcək”, Azərbaycan Qızıl Aypara Cəmiyyəti

Azərbaycan Qızıl Aypara Cəmiyyətinin icraçı katibi Ceyhun Mirzəyevin sözlərinə görə, Rusiyadan gələn yardımın erməni sakinlərə çatdırılması Azərbaycan Qızıl Aypara Cəmiyyəti ilə Rusiya Qızıl Xaç Cəmiyyəti arasında imzalanan birgə əməkdaşlıq memorandumu çərçivəsində həyata keçirilir.

“Rusiyadan gələn yardım avtomobili günorta saatlarında Samur buraxılış məntəqəsindən Azərbaycan ərazisinə keçib və Ağdam-Xankəndi istiqamətinə hərəkət edir”, – qurumun nümayəndəsi bildirib.

Siyasi təhlilçi Fərid Şəfiyev BBC Azərbaycancaya deyib ki, Rusiyanın yardım göndərərkən əməl etdiyi prosedur qaydalar Fransa üçün örnək olmalıdır.

“Rusiya Azərbaycan hökumətinə müraciət edir ki, sənə yardım göndərirəm və rəsmi Bakı özü müəyyən edir ki, bu yardımı Qarabağa hansı yolla çatdıracaq, artıq bu işlərə Rusiya qarışmır. Amma Fransa bunu etmir. Rəsmi Paris özbaşına çalışır Qarabağa yük göndərsin və Azərbaycan da haqlı olaraq bu formada yükləri qəbul etmir”, – Fərid Şəfiyev qeyd edib.

Rəsmi Bakı Ermənistanın Qarabağa göndərdiyi humanitar yardımın ölkəsinə girişinə icazə vermir. Bununla belə, Azərbaycan Qızıl Aypara Cəmiyyətinin bir neçə gündür ki, Xankəndiyə göndərdiyi 40 tonluq un məhsulu da Ağdam-Xankəndi yolunda, rus sülhməramlılarının postu qarşısında giriş icazəsi gözləyir.

Qızıl Aypara Cəmiyyətinin rəsmisi Rusiyanın göndərdiyi yardımla birlikdə Azərbaycan tərəfinin də ərzaq yardımının Qarabağa keçib-keçməyəcəyi ilə bağlı sualımızı cavablandırmayıb və bununla bağlı ictimaiyyətə əlavə məlumat veriləcəyini bildirib.

Azərbaycan Laçın dəhlizi və digər yolların eyni vaxtda açılmasına “hazırdır”, Hikmət Hacıyev

Azərbaycan ABŞ Dövlət Departamentinin rəsmisinin “Laçın və digər yolların dərhal və eyni vaxtda açılması” təklifini yerinə yetirməyə “hazır olduğunu” bildirib.

Azərbaycan Prezidentinin köməkçisi Hikmət Hacıyev deyib ki, əgər Azərbaycanın Qırmızı Aypara cəmiyyəti vasitəsilə Qarabağa göndərdiyi yardımın oradakı etnik ermənilərə çatdırılmasına icazə verilərsə, Azərbaycan da eyni vaxtda Ermənistandan Qırmızı Xaç Komitəsi vasitəsilə ora göndərilən yardımın keçidinə imkan yaratmağa hazırdır, Reuters agentliyi yazıb.

ABŞ dövlət katibinin Avropa və Avrasiya məsələləri üzrə köməkçisi vəzifəsini icra edən Yuri Kim cümə axşamı X (Twitter) sosial şəbəkə hesabından etdiyi paylaşımda Azərbaycan və Ermənistan xarici işlər nazirləri ilə danışdığını və Laçın, eləcə də digər yolların eyni vaxtda açılması təklifini irəli sürüb.

Rəsmi Yerevan ABŞ-ın bu təklifinə hələlik münasibət bildirməsə də, Ermənistan Xarici İşlər Nazirliyi cümə günü yaydığı bəyanatda rəsmi Bakı ilə “həll edilməmiş bütün məsələləri siyasi və diplomatik yolla” həll etməyə sadiq qaldığını vurğulayıb.

Yuri Kim-lə telefon müzakirəsində nazir Ceyhun Bayramov Qarabağda ermənilər yaşayan bölgədə “çətin humanitar vəziyyət” və “blokada” olması iddiasını rədd edib, Azərbaycan XİN yaydığı məlumatda bildirib.

Bu “bəhanə ilə Qarabağ bölgəsində yaşayan erməni sakinlərin cəmiyyətimizə reinteqrasiyası səylərinə müdaxilələrin qəbuledilməz olduğu diqqətə çatdırılıb”, – Azərbaycan XİN vurğulayıb.

Rəsmi Yerevan hesab edir ki, “Stepanakert və Bakı arasında hüquq və təhlükəsizlik təminatlarının müzakirəsi üçün effektiv beynəlxalq mexanizmin yaradılması zəruridir”, – Ermənistan XİN nazir Ararat Mirzoyanla Yuri Kim arasındakı söhbətlə bağlı yaydığı məlumatda bildirib.

Azərbaycan və Ermənistan bir-birini “hərbi-siyasi vəziyyəti gərginləşdirməkdə” ittiham edir

Azərbaycan Xarici İşlər Nazirliyi Ermənistanın Baş naziri Nikol Paşinyanın rəsmi Bakını hərbi-siyasi vəziyyəti gərginləşdirməkdə ittiham etməsini “saxta siyasi manipulyasiya” adlandırıb.

Nikol Paşinyan cümə axşamı keçirdiyi “hökumət iclası”nda Azərbaycanı Laçın dəhlizini blokadada saxlamağa davam etməkdə günahlandırıb və bildirib ki, bunun nəticəsində Qarabağda “humanitar böhran kuliminasiya nöqtəsinə” çatıb.

Sentyabrın 7-də Nikol Paşinyan keçirdyi iclasda ötən həftə ərzində Cənubi Qafqazda hərbi-siyasi vəziyyətin “əhəmiyyətli dərəcədə gərginləşdiyini” bildirib.

“Buna əsas səbəb Azərbaycanın Dağlıq-Qarabağda cəbhə xəttində və Ermənistan-Azərbaycan sərhədi boyu hərbi fəallığı artırmasıdır. Aydındır ki, bu addımlar Azərbaycanın Dağlıq-Qarabağ və Ermənistan əleyhinə yeni hərbi təxribat törətmə niyyətini göstərir. Saxta və həqiqətə uyğun olmayan açıqlamalar bu təxribata bəraət qazandırma məqsədi daşıyır”, – Paşinyan qeyd edib.

Azərbaycan isə bölgədə təhlükəsizliyə “əsl hədənin” Ermənistan tərəfindən gəldiyini bildirib.

“Ermənistan tərəfindən hərbi-siyasi təxribatların davam etməsi, Azərbaycanın ərazi bütövlüyü və suverenliyinə qarşı Baş nazir daxil olmaqla, Ermənistan tərəfinin davam edən iddiaları, öhdəliklərə zidd olaraq, Azərbaycan ərazilərindən hələ də çıxarılmayan erməni silahlı qüvvələri olduğu hər kəsə məlumdur”, – Azərbaycan XİN-in cümə axşamı yaydığı bəyanatında əks olunub.

Son bir neçə həftədir Azərbaycan və Ermənistan arasında atəşkəs rejiminin tez-tez pozulması halları müşahidə edilir və tərəflər mövcud vəziyyətə görə bir-birini ittiham edirlər.

Ermənistan lideri Cənubi Qafqazda yeni müharibənin qarşısını almaq üçün beynəlxalq ictimaiyyətin və BMT Təhlükəsizlik Şurasının üzvlərinin ciddi tədbirlər görməli olduğunu diqqətə çatdırıb.

“Bakı və Stepanakert (Xnakəndi-red.) arasında Dağlıq-Qarabağ ermənilərinin hüquqlarını və təhlükəsizliyini özündə ehtiva edən beynəlxalq mexanizm çərçivəsində dialoqun qurulması və Laçın dəhlizinin blokadadan çıxarılması ilə bağlı Beynəlxalq Ədalət Məhkəməsinin qərarlarının yerinə yetirilməsi olduqca vacibdir. Bütün bu sadaladıqlarımın əsasında Ermənistan Azərbaycanla münasibətləri normallaşdırmağa və sülh müqaviləsi imzalamağa hazırdır və biz sülh gündəliyinə sadiq olduğumuzu bir daha bəyan edirik”, – Paşinyan deyib.

Azərbaycan tərəfi isə hesab edir ki, bölgədə sülh və təhlükəsizliyin bərqərar olması üçün Ermənistan tərəfi Azərbaycana qarşı ərazi iddialarından əl çəkməli, hərbi və siyasi təxribatlara son qoymalı, sülh müqaviləsi danışıqlar prosesinin uğurla nəticələnməsi istiqamətində törədilən maneələri dayandırmalıdır, Azərbaycan XİN-in bəyanatında deyilir.

Avropa İttifaqı: “Ağdam yolundan da istifadə konkret və davamlı həllin bir hissəsi ola bilər”

Avropa İttifaqı Laçın dəhlizinin “blokadadan çıxarılmasının vacibliyinə və tədarükün, gündəlik təlabatların təmin edilməsi üçün Ağdam yolundan da istifadənin konkret və davamlı həllin bir hissəsi ola biləcəyinə qətiyyətlə inanır”. Bunu cümə günü verdiyi bəyanatında Avropa İttifaqı (Aİ) bildirib.

Avropa İttifaqı Şurasının Prezidenti Charles Michel Ermənistan-Azərbaycan arasında normallaşma prosesinin irəliləməsi yönündə intensiv addımlar atmağa davam edib, qurum bəyan edib.

“Yerlərdəki mövcud humanitar vəziyyət sürətlə pisləşir; yerli əhalinin ehtiyaclarını ödəmək üçün addımlar atılması mütləqdir”, Aİ hesab edib.

Qurum bəyanatında Bakı və Qarabağ erməniləri arasında dialoqun “mühüm əhəmiyyət kəsb etdiyini” vurğulayıb.

“Qarabağ ermənilərinin hüquqları və təhlükəsizliyi təmin edilməli, konkret üsullarla bağlı müzakirələr mümkün qədər tez başlamalıdır. Bakı ilə Qarabağ erməniləri arasında dialoq etimad və inamı gücləndirməlidir”, Aİ bildirib.

“Qeyd olunan səylər Bakı ilə Yeravan arasında münasibətlərin bütün yerli əhalinin rifahı naminə normallaşması naminə vacibdir. İndi həm də bugünki eskalasiya fonunda cəsarətli kompromis həllinin vaxtıdır”, – qurum vurğulayıb.

Avropa İttifaqı bu prosesə beynəlxalq dəstək, eləcə də əldə edilmiş razılaşmaların həyata keçirilməsi üçün yerlərdə iştirakla bağlı müxtəlif təkliflər verdiyini qeyd edib.

ABŞ humanitar yardımın Qarabağ əhalisinə çatması üçün “son həftələrdə tərəflərlə davamlı işləyib”

ABŞ humanitar yardımın “Dağlıq Qarabağ əhalisinə çatması üçün” son bir neçə həftə ərzində tərəflərlə “davamlı işləyib”, – ABŞ Dövlət Departamentinin cümə axşamı günü yaydığı bəyanatda deyilir.

ABŞ Dövlət Departamenti “Dağlıq Qarabağ blokadaya alındığı üçün” zəruri ərzaq, dərman və digər malların çatışmazlığına görə “humanitar şəraitin pisləşməsindən dərin narahat”lıq ifadə edib.

“Biz Laçın dəhlizinin təcili olaraq humanitar, kommersiya və sərnişin daşınması üçün yenidən açılmasına çağırışımızı təkrar edirik”, – bəyanatda vurğulanır.

Qurum bəyan edib ki, Bakı və Xankəndindən olan rəsmilər və nümayəndələr “təxirə salınmadan bir araya gələrək Dağlıq Qarabağın əhalisinə əlavə təchizat marşrutlarından istifadə etməklə zəruri ərzaqların daşınması barədə razılığa gəlməli və bütün həllolunmamış məsələlərin müzakirəsini davam etdirməlidirlər”.

“Zəruri humanitar yardım heç vaxt siyasi fikir ayrılıqlarının girovuna çevrilməməlidir”, – bəyanatda vurğulanıb.

“Əvvəlcə Laçın yolu açılsın, sonra Ağdamı müzakirə edək” – David Babayan

Azəbaycanın Ağdam-Xankəndi yolu ilə göndərdiyi yardımı qəbul etməyi Qarabağ erməniləri ancaq bir şərtlə nəzərdən keçirə bilər, Qarabağdakı separatçı hakimiyyət deyir.

“Biz Laçın dəhlizi normal fəaliyyət göstərməyənə qədər hər hansı humanitar yardım qəbul etməyi mümkün görmürük”, tanınmamış Dağlıq Qarabağ Respublikası prezidentinin müşaviri David Babayan BBC Azərbaycancaya deyib və əlavə edib: “Ondan sonra baxarıq”.

Azərbaycan Qızıl Aypara Cəmiyyətinin Xankəndiyə göndərdiyi 40 tonluq un məhsulları olan humanitar yardım Ağdam-Xankəndi yolunun təxminən 20 kilometrliyindədir, – BBC Azərbaycancanın hadisə yerində olan müxbirləri xəbər verir.

Azərbaycan prezidentinin müşaviri Hikmət Hacıyev BBC-yə deyib ki, Ağdam yolu açıldıqdan sonra “24 saat içərisində” Laçın yolu da açılacaq. “Yol nə qədər çox olarsa, hər kəs üçün yaxşı olar, o BBC-yə müsahibəsində deyib.

David Babayan isə bildirib ki, “Ağdam-Stepanaket yolu Laçın koridorunun tam fəaliyyət göstərməsi üçün alternativ və ya ön şərt ola bilməz”.

O hesab edir ki, 2020-ci ildə imzalanmış üçtərəfli razılaşmaya görə, Azərbaycan ən azı 2025-ci ilədək Laçın yolunu açıq saxlamalıdır.

Çərşənbə axşamı Azərbaycan Qızıl Aypara Cəmiyyətinin əməkdaşları Ağdam-Xankəndi yolu vasitəsi ilə Xankəndiyə 40 tonluq humanitar yardım aparmaq üçün Bakıdan yola çıxıb.

Çərşənbə günü Qızıl Aypara Cəmiyyətindən BBC-yə bildiriblər ki, qurum gətirdiyi unun keyfiyyət sertifikatını rus sülhməramlılara təqdim edib və hazırda Xankəndiyə getmək üçün onlardan cavab gözləyir.

Qurumdan BBC-yə verilən məlumata görə, hazırda Qızıl Aypara Cəmiyyəti Rusiya sülhməramlılarından neçə günə cavab alacaqlarını, gətirdikləri unu Xankəndiyə nə vaxt apara biləcəklərini dəqiq bilmir.

Bu səbəbdən ötən gecə Cəmiyyətinin əməkdaşları Rusiya sülhməramlılarının Ağdam-Xankəndi yolunun üzərindəki postu ilə üzbəüz istiqamətdə çadırlar quraşdıraraq orada gecələyiblər və hazırda da çadırları qurulu vəziyyətdədir.

Ermənilər etiraz edir

“Biz başqa ehtiyacların nələrdən ibarət olduğunu bilmirik. Əgər ehtiyac yaranarsa, digər ərzaq vasitələri də gətirməyə hazırıq”, – Azərbaycanın Qızıl Aypara Cəmiyyətindən BBC-yə deyiblər.

Qarabağın bir qrup erməni sakini isə çərşənbə axşamı günü Bakıdan ərzaq almaq təklifinə etiraz etmək üçün Rusiya sülhməramlılarının nəzarət-buraxılış məntəqəsinin qarşısına toplaşıblar, erməni mətbuatı yazır.

Yolu bağlayan “Artsax” sakinləri deyir ki, onlar “qatil dövlətdən heç bir kömək istəmirlər. Bu, onlar üçün qəbuledilməzdir və qırmızı xətdir”.

Sakinlər iddia edir ki, Azərbaycanın heç vaxt pasifist planı olmayıb və onun müntəzəm anti-erməni bəyanatları bunun sübutudur.

“Bu yolun açılmasına icazə verilə bilməz, çünki bu, DQ/Artsax xalqının ölümü deməkdir. Əgər azərbaycanlı hətta qondarma humanitar yardım adı altında DQ/Artsaxa girərsə, ona qarşı heç bir reaksiya olmayacaq. Bizim bu yolu açmağa haqqımız yoxdur, bu, bizə ölüm gətirəcək, bunun nəticəsində yavaş-yavaş DQ/Artsaxı tərk edəcəyik”, – aksiya iştirakçılarından biri bildirib.

Ötən gün separatçı hakimiyyətə məxsus “Artsakh press” yazıb ki, Azərbaycanın humanitar yardım göndərməsi Qarabağ erməniləri ilə razılaşdırılmayıb.

Tanınmamış “Dağlıq Qarabağ Prezidentinin mətbuat katibi” Lusine Avanesyan da yerli mediaya bildirib ki, Azərbaycanın bu addımı “mövcud problemləri dərinləşdirməyə yönəlib” onların “həllinə yox”.

Videoya YouTube kanalımızda baxın.

Lusine Avanesyan deyib ki, əgər Azərbaycan “həqiqətən də Artsax xalqının humanitar fəlakətini aradan qaldırmaqda maraqlıdırsa, Laçın dəhlizi ilə təchizatın bərpasını, sadəcə, qadağan etməməlidir”.

“Fransa merləri Yerevana gəlir”

Bakıdan yardım göndərilməsilə eyni vaxtda, həm də Fransadan Qarabağ ermənilərinə yardım götürülüb.

Armenpress yazır ki Fransanın paytaxtı Paris və ölkənin bir sıra iri şəhərlərindən “Artsax”a göndərilən humanitar yük avtomobilləri “Artsax”a getmək üçün Yerevandan Kornidzor istiqamətinə hərəkət edib.

Çərşənbə axşamı Qarabağdan olan jurnalist Marut Vanyan X-da (Twitter) yazıb ki, “Paris, Strasburq və Fransanın digər şəhərlərinin merləri Fransadan DQ/Artsax humanitar karvanına rəhbərlik etmək üçün” çərşənbə günü Yerevana gələcəklər.

“Hamı NK-ya yardım gətirir, amma biz hələ də acıq. Tapın görək, Fransa konvoyunun Dağlıq Qarabağa gəlməsini kim istəmir?”, Vanyan vurğulayıb.

Ermənistandan bir ay əvvəl göndərilmiş yardım maşınlarının karvanı Azərbaycan-Ermənistan sərhəddindən – Laçın yolu üzərindən buraxılmayıb.

Azərbaycan belə yardımların Ağdam-Xankəndi yolu ilə götürülməsini təklif etsə də, Qarabağ erməniləri bu təklifi hələ ki, rədd edir.

Çərşənbə axşamı günü Fransa Prezidenti Emmanuel Makron Azərbaycan və Ermənistan liderlərinə zəng edərək, Laçın yolu ətrafındakı vəziyyəti müzakirə edib.

Rəsmi mənbələrdə yayılmış məlumata görə, Prezident İlham Əliyev telefon söhbəti zamanı Laçın-Xankəndi yolunun açıla biləcəyini istisna etməyib, ancaq öncə Ağdam-Xankəndi yolunun açılmalı olduğunu bildirib.

“Prezident İlham Əliyev qeyd edib ki, Ağdam-Xankəndi yolu açıldıqdan sonra Azərbaycanın gömrük və sərhəd rejimi qaydalarına riayət etməklə Laçın-Xankəndi yolundan istifadə edilə bilər”, President.az saytındakı xəbərdə deyilir.

Ermənistan mediasının məlumatına görə, ötən gün Qarabağda separatçıların lideri Arayik Harutyunyan tanınmamış parlamentdə “6 saatdan çox çəkmiş müzakirələrdən” sonra bildirib ki, onlar yaranmış vəziyyətlə bağlı bir qərara gələ biməyiblər, amma “çörək problemi həll olunmalıdır”.

Azərbaycan bir ay əvvəl Ermənistandan Qarabağa göndərilən 400 tonluq humanitar yardımın ölkəyə girişinə icazə verməyib.

Qarabağ erməniləri Laçın dəhlizinin bağlı olmasına görə, humanitar böhranla üzləşdiklərini deyir, rəsmi Bakı isə bu iddiaları rədd edir.