Fransada etiraz aksiyasının iştirakçıları iyunun 27-dən bəri mindən çox mağazanı, 200 ticarət mərkəzini yandırıb və qarət ediblər.
Modern.az xəbər verir ki, bu barədə ölkənin iqtisadiyyat, maliyyə, sənaye və rəqəmsal suverenlik naziri Brüno Le Mer deyib.
Onun sözlərinə görə, iğtişaşlar zamanı 250 bank ofisi, 450 tütün dükanı, 200 ticarət mərkəzi və mindən çox mağaza hücuma məruz qalıb.
Nazir zərər çəkən sahibkarların bir müddət vergi və sosial ödəmələrdən azad ediləcəyini bildirib. Eyni zamanda qeyd olunub ki, hakimiyyət orqanları iğtişaşların ziyan vurduğu biznesə sığorta kompaniyaları ilə bağlı məsələlərin həllində kömək göstərəcək.
Xatırladaq ki, Nanter şəhərində Əlcəzair əsilli yeniyetmənin polis tərəfindən güllələnməsindən sonra ölkəni iğtişaşlarla müşayiət olunan etiraz dalğası bürüyüb. Fransa Daxili İşlər Nazirliyinin məlumatına görə, indiyədək 737 polis əməkdaşı xəsarət alıb, iğtişaşlarda iştirak edən 3,5 min nəfər saxlanılıb.