• 29 Mart 2024 09:09

Rusiya Ukraynada mühüm bəndi dağıdıb

İyn 6, 2023

Ukraynada Dnepr çayı üzərindəki Kaxovka Su Elektrik Stansiyasının bəndi dağılıb. Rəsmi Kiyev bəndin dağılmasında Rusiyanı ittiham edib. Moskva iddiaları rədd edir.

Xerson vilayətinin cənubunda yerləşən, hazırda Rusiya işğalı altında olan Novaya Kaxovka şəhərində minlərlə ev su atında qala bilər.

Xersonun regional qubernatoru Oleksandr Prokudin deyib ki, bəndin dağılmasından sonra ərazidəki azı səkkiz müxtəlif yaşayış məntəqəsi artıq su altında qalıb və səlahiyyətlilər bölgədə daha çox daşqınlara hazırlaşır.

Rusiyanı döyüş meydanında məğlub etmək mümkün deyil? Putinin müharibə haqda dedikləri və cəbhədəki real vəziyyət
Ukrayna müharibəsi: Putin hansı müharibə cinayətlərində ittiham olunur?
Onun sözlərinə görə, azı 16 min insan sel suları təhlükəsi ilə üz-üzədir.

Kaxovka su anbarı
Prokudin Telegram-da qeyd edib ki, risk altında olan bölgələrdə yaşayan sakinlər avtobuslarla Xersona təxliyə olunur, daha sonra onlar paytaxt Kiyev də daxil olmaqla, ölkənin müxtəlif şəhərlərinə köçürüləcəklər.

O əlavə edib ki, təxliyə qatarı günorta Xersondan Mykolayv şəhərinə yola düşəcək.

Rusiya Nova Kaxovka Kaxovka SES su elektrik stansiyası
ŞƏKLİN MƏNBƏYİ,ТАСС
BMT: Soyuducu suyun olmaması Zaporojye AES-in generatorlarını sıradan çıxara bilər
BMT-nin atom energetikasına nəzarət idarəsinin rəhbəri bildirib ki, Zaporojye nüvə stansiyasında soyuducu suyun olmaması onun dizel generatorunun sıradan çıxmasına səbəb ola bilər.

Atom stansiyasının ətrafı – dağıdılmış bəndin yaxınlığındakı sahə – Rusiyanın nəzarətində olan Ukrayna ərazisindədir.

“Əsas soyutma su sistemlərində uzun müddət soyuducu suyun olmaması yanacağın əriməsinə və qəza dizel generatorlarının sıradan çıxmasına səbəb ola bilər”, – Beynəlxalq Atom Energetikası Agentliyinin rəhbəri Rafael Grossi deyib.

Lakin onun sözlərinə görə, “stansiyanın təhlükəsizliyi üçün dərhal risk” yoxdur və ərazidə iri soyuducu hovuz da daxil, bir sıra alternativ su mənbələri var.

bəndin dağılan hissəsi
Bəndlərə hücum müharibə cinayətidirmi?
Jeremy Howell

BBC News

Bundan əvvəl Aİ Şurasının Prezidenti Charles Michel Rusiyanı Novaya Kaxovkadakı bəndə hücumda ittiham edərək, bunu “müharibə cinayəti” adlandırıb.

Londondakı King’s College-in münaqişə və təhlükəsizlik üzrə eksperti professor Tracey German-ın sözlərinə görə, bəndlər mülki infrastrukturdur və ümumən etibarlı qanuni hərbi hədəflərə aid edilmir.

“Tutaq ki, bəndin ətrafında Ukrayna hərbi birləşmələri yerləşir. Silahlı münaqişə qaydalarına görə, Rusiya qüvvələri onu hərbi hədəf olaraq qəbul edə bilər. Amma bildiyimə görə, məsələ belə olmayıb”.

“Bənd kimi mülki hədəfə hücum hərbi zərurətdən irəli gəlməlidir”, – Beynəlxalq Hüquqşünaslar Assosiasiyasının icraçı direktoru dr. Mark Ellis əlavə edir.

“Ancaq əldə edilən hərbi üstünlük kiçikdirsə və mülki əhaliyə dəyən ziyan fəlakətlidirsə, bu, beynəlxalq hüququn pozulması olacaq”.

Dr. Ellis-ə əsasən, bu meyarlar Rusiyanın cavabdeh olduğu hər hansı hücuma haqq qazandıra bilməz. Amma, eyni zamanda, Ukrayna qüvvələri 2022-ci ilin fevralında Kiyevdən şimaldakı torpaqları su altında qoyaraq, Rusiyanın paytaxta irəliləyişinin qarşısını almaq üçün İrpen bəndini dağıdanda bu, hərbi zərurətə əsaslanan addım idi.

Kaxovka bəndi niyə vacibdir?
Kaxovka bəndi
Kaxovka bəndi çayyuxarı yerləşən yaşayış məntəqələrini su ilə təmin edən böyük su anbarını saxlayır və bu o deməkdir ki, insanların su təchizatına təsir göstərə bilər.

Bəndin saxladığı su anbarı həm də Rusiyanın nəzarəti altında olan, çayyuxarı 160 kilometrlik ərazidəki Zaporojye atom elektrik stansiyasını soyutma suyu ilə təmin edir. O, Avropanın ən böyük atom elektrik stansiyasıdır.

Kaxovka bəndi sovet vaxtı tikilib və ölkənin şimalından cənubda, dənizə qədər uzanan Dnepr çayı boyunca tikilmiş altı bənddən biridir.

Zelenski Rusiyanı ittiham edir
Ukrayna Prezidenti bəndin dağıdılmasına görə Rusiyanı ittiham edib.

“Rus terrorçuları. Kaxovka su elektrik stansiyasının bəndinin dağıdılması yalnız bütün dünyaya təsdiq edir ki, onlar Ukrayna torpaqlarının hər yerindən qovulmalıdırlar. Onlara bir metr belə qalmamalıdır, çünki onlar hər bir metri terror üçün istifadə edirlər. Təhlükəsizliyi yalnız Ukraynanın qələbəsi bərpa edəcək. Və bu qələbə gələcək”, – Volodimir Zelenskinin Twitter hesabında yayılan açıqlamada deyilir.

“Terrorçular Ukraynanı su, raket və ya başqa bir şeylə dayandıra bilməyəcəklər. Bütün xidmətlər işləyir. Mən Milli Təhlükəsizlik və Müdafiə Şurasını çağırmışam. Lütfən, yalnız rəsmi və təsdiqlənmiş məlumatları yayın”.

Kreml SES-in partladılmasında əli olması ilə bağlı ittihamları rədd edib
Rəsmi Moskva hadisədə əli olması ilə bağlı ittihamları rədd edib. Kremlin nümayəndəsi SES-in dağıdılmasını Kiyev tərəfindən “planlaşdırılan təxribatın” nəticəsi adlandırıb.

Bu barədə Rusiya Prezidentinin mətbuat katibi Dmitri Peskov deyib.

“Biz onları (ittihamları) qətiyyətlə rədd edə bilərik. Rəsmən bəyan edirik ki, burada söhbət birmənalı şəkildə Ukrayna tərəfinin, Kiyevdən gələn və Kiyev rejiminin əmri ilə planlaşdırılan və həyata keçirilən məqsəd yönlü təxribatdan gedir”.

Yerli idarəetmə orqanlarının sosial şəbəkələrdə yayımlanan videomüraciətində beş saat ərzində Dnepr çayında suyun səviyyəsinin “kritik” olacağı barədə xəbərdarlıq edilib.

Bəndin dağılması ilə artıq yaşayış məntəqələrini su basması görüntüləri yayılır.

Oleksandr Prokudin həm də qarşı sahildə – hazırda Rusiyanın nəzarətində olan sakinləri dərhal evlərini tərk etməyə çağırıb.

Bildirilir ki, bəndin dağılması Xerson şəhərini sular altında qoya bilər.

Avropa İttifaqı Şurasının Prezidenti Charles Michel Twitter-dən bildirib ki, Rusiya Kaxovka SES-in dağıdılmasına görə məsuliyyət daşıyır.

Cənab Michel mülki infrastrukturun dağıdılmasını “açıq-aydın müharibə cinayəti” adlandırıb.

Bu iddiaların heç biri BBC tərəfindən təsdiqlənməyib.

Rusiya hadisə ilə bağlı hələlik şərh verməyib. İşğal altında olan Nova Kaxovkanın rəhbəri iddia edib ki, SES Ukraynadan atılan atəş nəticəsində zədələnib.

Tass xəbər agentliyi bölgədə fövqəladə vəziyyət elan edildiyini bildirib. (BBC.com)