Avropa İttifaqına üzv ölkələrin Brüsseldəki səfirləri bu həftə Polşa və Macarıstanın Ukraynadan taxıl və digər ərzaq məhsullarının idxalını qadağan edən addımını müzakirə edəcəklər.
APA “Reuters”ə istinadən xəbər verir ki, bu barədə Aİ-nin adı açıqlanmayan yüksək rütbəli rəsmisi deyib.
“Biz Polşa və Macarıstanın açıqlama verməsini gözləyirik və Avropa Komissiyası tərəfindən də məsələyə reaksiya olacaq”, – Aİ rəsmisi deyib.
O bildirib ki, bu məsələ Aİ-yə üzv dövlətlərin liderləri tərəfindən son sammitdə də qaldırılıb.
“Bir problem var və biz Avropa Komissiyasının bununla bağlı təkliflə çıxış edəcəyini gözləyirik… Bundan sonra qarşıdakı həftələrdə və aylarda hansı addımlar ata biləcəyimizi görəcəyik”.
Qeyd edək ki, Ukraynanın kənd təsərrüfatı naziri bildirib ki, Kiyev bu gün Varşavada keçirilən danışıqlarda ilk addım olaraq Polşa üzərindən ərzaq və taxıl tranzitini yenidən açmaq istədiyini deyib.
Xatırladaq ki, Polşa, Macarıstan və Slovakiya Ukraynadan taxıl ixracını dayandırdıqlarını bildiriblər. Bu addımın yerli bazarın tələbi və yerli fermerləri qorumaq üçün atıldığı bildirilir.