• 28 Fevral 2024 10:52

Tofiq Yaqubluya və Bəxtiyar Hacıyevə dəstək üçün 13 fəal aclıq edir

Yan 10, 2023

Müxalif siyasətçi Tofiq Yaqublu ilə həmrəylik əlaməti olaraq bu gün daha 5 fəal aclıq aksiyasına qoşulub və aksiyanın iştirakçılarının ümumi sayı 13 nəfərə çatıb.

Bu gün AXCP fəalları Günel Babayeva və Gülnarə Rəhimova siyasətçinin həyat yoldaşı, yanvarın 7-dən aclıq edən Maya Yaqubluya qoşulublar.

Elə bu gün Müsavat Partiyasının qərargah-mənzilində AXCP üzvləri Təvəkkül Həsənov, İsmailiddin Qasımov və Zəkrulla Nağıyev aclığa başlayıblar. Onlar yanvarın 8-dən Yaqublunun evində aclıq edən Seymur Əhmədsoya və Elnur Quliyevə qoşulublar.

Yanvarın 9-da AXCP fəalları Babək Həsənov, Əlizamin Salayev, Ceyhun Novruzov, Əlizamin Kazımov, Sakit Məmmədli, Tofiq Məmmədov və Müsavat Partiyasının üzvü Əziz Məmiyev aclıq aksiyasına qoşulublar.

Bu gün Müsavat Partiyasının qərargah-mənzilində “təcili yardım” həkimləri aclıq aksiyasının iştirakçılarını müayinə ediblər. Fəalların səhhətində ciddi problemlər aşkar edilməyib.

Aksiya iştirakçıları Tofiq Yaqublunun, ictimai fəal Bəxtiyar Hacıyevin və digər siyasi fəalların azad edilməsini tələb edirlər.

“Hələlik hökumətdən tələblərimizə heç bir cavab gəlməyib. Hüquq müdafiəçiləri və ictimai-siyasi fəallar bizə baş çəkiblər, dəstəklərini ifadə ediblər”, deyə aksiya iştirakçısı Babək Həsənov bildirib.

Tofiq Yaqublunun həyat yoldaşı, yanvarın 7-dən aclıq edən Maya Yaqublu böyrəklərində ağrılar başladığını deyib.

“Amma mən həkimə müraciət etmirəm. Hələlik tələblərimizə cavab yoxdur. Bu gün mən Müsavat Partiyasının qərargah-mənzilində aclıq edənlərə baş çəkəcəyəm”, deyə M.Yaqublu bildirib.

* Demokratik Qüvvələrin Milli Şurasının və Müsavat Partiyasının üzvü Tofiq Yaqublu dekabrın 23-də Bakının mərkəzində ictimai fəal Bəxtiyar Hacıyevin azad edilməsi tələbi ilə keçirilən etiraz aksiyasında saxlanılıb.

Elə həmin gün Səbail Rayon Məhkəməsi onu kiçik xuliqanlıq və polisə tabe olmama ittihamı ilə 30 gün müddətinə həbs cəzasına məhkum edib. Yanvarın 5-də Bakı Apellyasiya Məhkəməsi bu qərarı qüvvədə saxlayıb. Etiraz əlaməti olaraq Yaqublu aclıq elan edib.

** Bəxtiyar Hacıyev dekabrın 9-da xuliqanlıq və məhkəməyə hörmətsizlik ittihamı ilə saxlanılıb. Elə həmin gün Xətai Rayon Məhkəməsi onu 1 ay 20 gün müddətinə həbs edib.

Dekabrın 15-də Hacıyev həbsdən azad edilməsi tələbi ilə aclıq elan edib. O, ictimaiyyət nümayəndələrinin və ailə üzvlərinin israrlı çağırışlarından sonra dekabrın 28-də axşam aclığı dayandırıb. Amma yanvarın 9-da Apellyasiya Məhkəməsinin növbəti dəfə onun həbsindən verdiyi şikayəti təmin etməməsindən sonra Hacıyev aclığı bərpa edib.