Kraliçanın vəfatından sonra taxt-tac dərhal və hər hansı mərasim olmadan onun varisi, keçmiş Uels şahzadəsi Charles-a keçib.
Amma Charles-ın taxt-taca sahib olması üçün onun bir neçə əməli və ənənəvi mərhələlərdən keçməyi tələb edilir.
O necə adlanacaq?
O, Kral III Charles kimi tanınacaq.
Bu, yeni kralın hakimiyyətinin ilk qərarı idi. O, dörd adından hər hansı birini seçə bilərdi – Charles Philip Arthur George.
Titulu dəyişən təkcə o olmayacaq.
Şahzadə William taxtın varisi olsa da, avtomatik olaraq Uels şahzadəsi olmayacaq.
Bununla belə, o, dərhal atasının digər titulunu – Cornwall hersoqluğunu miras alır.
Charles-in xanımı Catherine Cornwall hersoginyası olaraq tanınacaq. Charles-ın xanımı da həmçinin yeni titul daşıyacaq, onun tam titulu konsort Kraliça olacaq – konsort monarxın həyat yoldaşı üçün istifadə olunan termindir.
Rəsmi mərasimlər
Anası öldükdən sonra ilk 24 saat ərzində və ya sonra Charles Kral olaraq elan ediləcək.
Bu, Londondakı Müqəddəs James Sarayında Taxt-taca Qəbul Etmə Şurası qarşısında baş verəcək.
Şuraya yüksək vəzifəli indiki və keçmiş deputatların, bəzi yüksək rütbəli dövlət qulluqçularının, zadəganların, eləcə də Britaniya Millətlər Birliyinin yüksək komissarları və Londonun Bələdiyyə sədrinin təmsil olunduğu Kraliyyət Məsləhətləşmə Məclisi üzvləri daxildir.
ŞƏKLİN MƏNBƏYİ,PA MEDIA
Mərasimdə nəzəri olaraq 700-dən çox adam iştirak etmək hüququna malikdir, lakin qısa məlumatı nəzərə alsaq, faktiki iştirakçı sayı çox az ola bilər. 1952-ci ildə keçirilən sonuncu Taxt-Taca Qəbul Etmə Şurasında təxminən 200 nəfər iştirak edib.
Burada Kral ənənəvi olaraq iştirak etmir.
İclasda Kraliça Elizabeth-in ölümünü Taxt-Taca Qəbul Etmə Şurasının Prezidenti (hazırda millət vəkili Penny Mordaunt) elan edəcək və bəyannamə səsləndirəcək.
Onun mətni dəyişə bilər, lakin bu, ənənəvi olaraq, əvvəlki monarxı tərifləyən və yenisinə dəstək vəd edən bir sıra dualar və vədlərdən ibarət olur.
Bu bəyannamə daha sonra baş nazir, Canterbury arxiyepiskopu və lord kansler də daxil olmaqla bir sıra yüksək vəzifəli şəxslər tərəfindən imzalanır.
Bütün bu mərasimlərdə olduğu kimi burada da yeni bir dövrün əlaməti olaraq, nələrin dəyişdirilmiş, əlavə edilmiş və ya yenilənmiş ola biləcəyinə diqqət yetiriləcək.
Kralın ilk açıqlaması
Taxt-Taca Qəbul Etmə Şurası təkrar toplaşacaq, adətən, bu, bir gün sonra olur və bu dəfə Kral da Kraliyyət Məşvərət Şurası ilə birgə iştirak edir.
Britaniya monarxının hakimiyyətinin başlanğıcında ABŞ Prezidenti və ya başqa dövlətlərin başçıları kimi “and içmə” ənənəsi yoxdur.
Ancaq yeni Kral tərəfindən elan edilən bir açıqlama olur və XVIII əsrin əvvəllərindən qalan bir ənənəyə uyğun olaraq, o, Şotlandiya Kilsəsini qorumaq üçün and içəcək.
Trumpetlər ifa edəndən sonra Charles-in yeni Kral elan edilməsi ilə bağlı ictimai bəyanat veriləcək. Bunu Müqəddəs James Sarayındakı Friary Məhkəməsinin üstündəki eyvandan Carçı adlandırılan məmur elan edəcək.
ŞƏKLİN MƏNBƏYİ,GETTY IMAGES
O deyəcək “Tanrı Kralı qorusun!” və 1952-ci ildən bəri ilk dəfə dövlət himninin səsləndirildiyi zaman sözlər “Tanrı Kralı qorusun” olacaq.
Hyde Parkda, London Qülləsində və donanma gəmilərindən silahlardan atəş açılacaq. Edinburgh, Cardiff və Belfastda Charles-in Kral olduğu elanı oxunacaq.
Tacqoyma mərasimi
Charles rəsmi olaraq tac qoyduğu zaman təyinatın ən yüksək simvolik mərhələsi sayılan tacqoyma mərasimi keçiriləcək. Charles-ın təyinatından sonra hazırlıqların görülməsinə ehtiyac olduğundan tacqoyma mərasiminin qısa müddətdə baş tutması ehtimalı aşağıdır. Kraliça Elizabeth 1952-ci ilin fevralında taxta sahib olsa da, yalnız 1953-cü ilin iyununda tac qoydu.
Ötən 900 il ərzində tacqoyma mərasimi Westminster Abbey-də keçirilib, Fateh William orada tac qoyan ilk monarx idi və Charles bu sıralamada 40-cı olacaq.
Tacqoyma Canterbury baş arxiyepiskopu tərəfindən həyata keçirilən Anglikan kilsəsinin mərasimidir. Mərasimin ən çox gözlənilən hissəsində, baş arxiyepiskop Müqəddəs Edward-ın 1661-ci ilə aid olan və xalis qızıldan hazırlanmış tacını Charles-ın başına qoyacaq.
Bu tac London Qülləsindəki kral ailəsinə məxsus bahalı daşların ən önəmli hissəsidir və monarx onu yalnız tacqoyma mərasimində taxır (ən azından ona görə ki, qızıl tacın ağırlığı 2,23 kiloqramdır).
Kral toylarından fərqli olaraq, tacqoyma mərasimi dövlət tədbiri hesab olunur, ona görə də bu mərasimin xərclərini hökumət çəkir və qonaqların siyahısını hazırlayır.
ŞƏKLİN MƏNBƏYİ,MIRRORPIX / GETTY IMAGES
Orada musiqi, ritual qaydaların oxunması, eləcə də yeni monarxa portağal, qızılgül, darçın müşk və kəhrəbadan hazırlanan müqəddəs yağ sürtməklə bağlı mərasim keçiriləcək.
Yeni Kral dünyanın gözü qarşısında tacqoyma andı içəcək. Mərasim zamanı ona yeni vəzifəsinin simvolları kimi kürə və əsa təqdim ediləcək və Cantenbury baş arxiyepiskopu xalis qızıldan olan tacı onun başına qoyacaq.
Birliyin rəhbəri
Charles 56 müstəqil ölkədən olan 2,4 milyard insanı birləşdirən Birliyin rəhbəri olacaq. Birləşmiş Krallıq da daxil olmaqla, bu ölkələrdən 14-də Kral dövlətin başçısıdır.
Birlik krallıqları olaraq tanınan həmin ölkələr bunlardır: Avstraliya, Antiqua və Barbuda, Baham adaları, Belize, Kanada, Qrenada, Yamayka, Papua Yeni Qvineya, Müqəddəs Christopher və Nevis, Müqəddəs Lucia, Müqəddəs Vincent və Grinadines, Yeni Zelandiya, Solomon adaları və Tuvalu.
ŞƏKLİN MƏNBƏYİ,GETTY IMAGES